বৰপেটা , 02 এপ্ৰিলঃকলগাছিয়াত সোমবাৰে দুখন চোৰাং ৰাসায়নিক সাৰৰ গাড়ী জব্দ কৰা হয় । চোৰাং বজাৰত বিক্ৰীৰ বাবে লৈ যোৱা অৱস্থাত ৰাইজে জব্দ কৰে কৃষকৰ বাবে যোগান ধৰা প্ৰায় 100 কুইণ্টল সুলভ মূল্যৰ ৰাসায়নিক সাৰ ।
সোমবাৰে নিশা দৰিদ্ৰ কৃষক সকলক সুলভ মূল্যত যোগান ধৰিবলৈ আৱণ্টন দিয়া ৰাসায়নিক সাৰ সমূহ AS-15C-7973 আৰু AS-25CC-3722 নম্বৰৰ দুখন বলেৰ'পিক আপ বাহনেৰে বিক্ৰীৰ বাবে লৈ যোৱা হৈছিল ৷ তেনে সময়তে কলগাছিয়াত ৰাইজে চোৰাং ৰাসায়নিক সাৰ ভৰ্তি গাড়ী কেইখন জব্দ কৰে ৷ উল্লেখ্য যে বৰপেটাৰোডৰ ফৰমান আলীৰ অপ্সৰা বীজ ভাণ্ডাৰৰ পৰা কলগাছিয়াৰ বাংকাভাঙ্গা বজাৰৰ ছাবেদ আলী নামৰ এজন চোৰাং বেপাৰীৰ হাতত বিক্ৰী কৰিবলৈ লৈ যোৱা অৱস্থাত জব্দ কৰা হয় বাহন দুখন ৷ জব্দকৃত বলেৰ' পিক আপ বাহন দুখন ৰাইজে আৰক্ষীক গতাই দিয়ে । ইপিনে কৃষক সকলক বঞ্চিত কৰি শ শ কুইন্টল চৰকাৰী ৰাসায়নিক সাৰ এইদৰে ক'লা বজাৰত বিক্ৰী কৰা ঘটনাই কৃষক সমাজৰ মাজত তীব্ৰ প্ৰতিক্ৰিয়াৰ সৃষ্টি কৰিছে । সেয়ে এই দুষ্কাৰ্যৰ লগত জড়িত থকা অসাধু ব্যৱসায়ী সকলক কঠোৰ শাস্তি প্ৰদান কৰিবলৈ আমছুৰ লগতে কৃষক ৰাইজে দাবী জনায় ।
