জনীয়া, 18 জুলাই : বৰপেটা জিলাৰ কলগাছিয়া ৰাজহ চক্ৰৰ অন্তৰ্গত পাহাৰতলি গোবিন্দপুৰত বেকী নৈ (Beki River)ৰ বিধ্বংসী খহনীয়া (Erosion) অব্যাহত ৷ নৈখনৰ বুকুত জাহ গৈছে শতাধিক পৰিয়ালৰ মাটি-ভেটি । ইয়াৰ লগতে খহনীয়াই তীব্ৰ ভাবুকি কঢ়িয়াই আনিছে গোবিন্দপুৰ প্ৰাথমিক বিদ্যালয়লৈ ৷
বাঘবৰ সমষ্টি (Baghbar Constituency) তথা কলগাছিয়া ৰাজহ চক্ৰৰ চতলা গাঁও পঞ্চায়তৰ অন্তৰ্গত পাহাৰতলি গোবিন্দপুৰ গাঁৱত বিগত ছমাহ ধৰি অব্যাহত আছে এই খহনীয়া । বিগত দহদিন ধৰি খহনীয়াই ৰুদ্ৰমূৰ্তি ধাৰণ কৰাৰ ফলত কেইবাটাও পৰিয়ালৰ ঘৰ-দুৱাৰ নৈয়ে উটুৱাই লৈ গৈছে ৷ গাঁৱবাসীৰ ঘৰ-বাৰী নৈয়ে উটুৱাই নিয়াৰ ফলত গৃহহীন হৈ পৰিছে বহুকেইটা পৰিয়াল ।
সমান্তৰালকৈ শ শ বিঘা মৰাপাট আৰু ইৰি ধানৰ খেতি বেকী নৈত বিলীন হোৱাৰ বাবে পথৰ ভিক্ষাৰী হৈ পৰিছে ভুক্তভোগীসকল ৷ গোবিন্দপুৰ প্ৰাথমিক বিদ্যালয় (Gobindapur Primary School)খন নৈৰ বুকুত জাহ যোৱাৰ লেখীয়া হৈ পৰাত শংকিত হৈ পৰিছে নৈপৰীয়া ৰাইজ ৷ খহনীয়াৰ তাণ্ডৱত ঘৰ-দুৱাৰ ভাঙি এতিয়া নিৰাপদ স্থানলৈ ঢাপলি মেলিছে খহনীয়াগ্ৰস্ত লোকসকল ।
এনে দুৰ্দশাৰ সময়তো সাংসদ-বিধায়কে খহনীয়াগ্ৰস্তসকলৰ খবৰ ল’বলৈ আহৰি নোপোৱাত ক্ষুদ্ধ হৈ পৰিছে ৰাইজ । শীঘ্ৰে খহনীয়া প্ৰতিৰোধ নকৰিলে নৈৰ বুকুত সমূহীয়াকৈ আত্মজাহ দিব লাগিব দুখ প্ৰকাশ কৰিছে ভুক্তভোগী ৰাইজে ৷ ইয়াৰ পূৰ্বে কলগাছিয়াৰ খাৰবাল্লীতো বেকী নৈয়ে (Beki River) সৃষ্টি কৰিছিল তীব্ৰ খহনীয়া ৷ বিধ্বংসী খহনীয়াত আশ্ৰয়হীন হ’বলগীয়া হয় অঞ্চলটোৰ 7 টাকৈ পৰিয়াল ৷
লগতে পঢ়ক : পথাৰত হাল বাঁওতেই কপাল ফুলিল কৃষকৰ
