বৰপেটা, 15 এপ্ৰিলঃ বৰপেটা সত্ৰৰ পৰম্পৰা অনুসৰি প্ৰতিবছৰে পহিলা বহাগৰ দিনা পুৱা সত্ৰৰ নিত্য নৈমিত্তিক প্ৰসংগ শেষ হোৱাৰ পাছত সত্ৰৰ দৈব্যজ্ঞই দেশ আৰু ৰাজ্যৰ উপৰি ব্যক্তিগত বাৰটা ৰাশিৰ অপায়,অমংগল ,সম্ভাৱনা,দুৰ্ভাৱনা ,আয়-ব্যয় আদি বিভিন্ন দিশক সামৰি সম্যক বৰ্ষফল গণনা কৰে ৷ ইয়াকে বৰপেটা সত্ৰৰ বিহু গণনা বুলি কোৱা হয় ৷ দৈব্যজ্ঞই প্ৰথমে কীৰ্তন ঘৰৰ গুৰু আসনৰ পিছফালে, তাৰ পাছত মঠৰ চোতালত আৰু শেষত আইসকলৰ নামখোলাত বৰ্ষচক্ৰ গণনা কৰে ৷
বৰ্ষাৰম্ভ চক্ৰৰ জন্ম ৰাশিত চন্দ্ৰ ষষ্ঠ স্থানত, বৃহস্পতি,শনি আৰু কেতু নৱম স্থানত,বুধ আৰু শুক্ৰ দশম স্থানত,ৰবি একাদশ স্থানত আৰু মংগল দ্বাদশ স্থানত অৱস্থান কৰাত ৰাজ্যখনৰ বাবে বছৰটো অনুকূল নহয় ৷ বৰ্ষচক্ৰ গণনা মতে অসম দেশৰ ৰাশি কৰ্কট ৷ এই কৰ্কট ৰাশিৰ ফল অনুসাৰে গোপন ষড়যন্ত্ৰৰ ফলত অসম মন্ত্ৰীসভাত কন্দল সৃষ্টি কৰিব পাৰে আৰু গোপন দলীয় সংঘাতে বিজেপি দলকো শ'লঠেকত পেলোৱাৰ সম্ভাৱনা আছে ৷ বৰপেটা সত্ৰৰ এই পৰম্পৰাগত বৰ্ষফল গণনাত ৰাষ্ট্ৰীয় ৰাজনীতি সম্পৰ্কেও গণনা কৰা হৈছে ৷ দৈৱজ্ঞৰ গণনাত কলে দেশৰ প্ৰধানমন্ত্ৰী নৰেন্দ্ৰ মোডীৰ ১৫ বছৰৰ ৰাজ শাসনৰ যোগ আছে ৷ এইবাৰো কেন্দ্ৰত বিজেপি চৰকাৰৰ সম্ভাৱনাৰ কথা ব্যক্ত কৰে ৷ আনহাতে মুখ্যমন্ত্ৰী সৰ্বানন্দ সোণোৱালৰ জন্ম ৰাশিৰ গণনা অনুসাৰে ২০ এপ্ৰিলৰ পৰা মুখ্যমন্ত্ৰীৰ চন্দ্ৰ আৰু বৃহস্পতিৰ প্ৰভাৱত ৰাজনীতিত উন্নতিৰ যোগ সূচাইছে বুলি বৰ্ষফল গণনাত প্ৰকাশ পাইছে ৷
