বৰপেটা, 8 ফেব্ৰুৱাৰী: বৰপেটাবাসীৰ আৰ্থ-সামাজিক জীৱনৰ সৈতে ওতঃপ্ৰোতভাৱে জড়িত হৈ আছে বৰপেটা সত্ৰ ৷ এই সত্ৰক কেন্দ্ৰ কৰিয়েই বিভিন্ন ভাস্কৰ্য শিল্পৰে সমৃদ্ধ হৈ পৰিছে বৰপেটা ৷ গুৰু আসন নিৰ্মাণ আৰু কাঠত খোদিত কৰি বিভিন্ন ভাস্কৰ্য নিৰ্মাণ কৰা হয় বৰপেটা সত্ৰত ৷ অসমৰ সমাজ,সাহিত্য,সংস্কৃতিত বৰপেটাৰ এক সুকীয়া স্থান আছে ৷
সাতামপুৰুষীয়া কৃষ্টি-সংস্কৃতিৰ সৈতে বৰপেটাবাসী জড়িত হৈ থকাৰ লগতে বহু যুৱকে ভাস্কৰ্য শিল্পৰ সৈতে নিজকে জড়িত কৰি স্বাৱলম্বী হৈছে ৷ বৰপেটাৰ কেইবাটাও পৰিয়ালে গুৰু আসন নিৰ্মাণৰ জৰিয়তে জীৱিকা নিৰ্বাহৰ বাট মুকলি কৰিবলৈ সক্ষম হৈছে ৷ বৰপেটাৰ বহু ভাস্কৰ্য শিল্পীৰ ভিতৰত উল্লেখযোগ্য হৈছে কবিন দাস,হিতেশ দাস আৰু নিৰ্মল দাস ৷
শ্ৰীমন্ত শংকৰদেৱ-মাধৱদেৱৰ সময়ৰ পৰাই সত্ৰৰ নামঘৰসমূহত বিভিন্ন ধৰ্মীয় আখ্যানৰ চিত্ৰ কাঠত কাটি লগোৱাৰ যি পৰম্পৰা চলি আহিছে সেই পৰম্পৰা জীয়াই ৰাখিছে বৰপেটাৰ এইসকল ভাস্কৰ্য শিল্পীয়ে ৷ ৰামায়ণ,মহাভাৰত,গীতা,ভাগৱতত বৰ্ণিত বিভিন্ন আখ্যানৰ চিত্ৰ কাঠত কাটি জীৱন্ত ৰূপ দিয়া বৰপেটাৰ এই ভাস্কৰ্য শিল্প বৰপেটা সত্ৰৰ লগতে ৰাজ্যৰ বিভিন্ন সত্ৰ,থান,নামঘৰত সংৰক্ষিত হৈ আছে ৷ কেৱল অসমতে নহয়,দেশৰ বিভিন্ন প্ৰান্ততো এই ভাস্কৰ্য শিল্পীয়ে নিৰ্মাণ কৰা গুৰু আসন আৰু কাঠত কটা আন আন শিল্প ভাস্কৰ্য স্থাপন কৰা হৈছে ৷ এই ভাস্কৰ্যসমূহ আমেৰিকাবাসী বহু অসমীয়া পৰিয়ালে প্ৰতিষ্ঠা কৰিছে নিজ নিজ বাসগৃহত ৷
অৱশ্যে ইয়াৰ মাজতো আছে এইসকল শিল্পীৰ আৰ্থিক সমস্যা ৷ শিল্পটো জীয়াই ৰাখিবলৈ অথবা ইয়াৰ প্ৰসাৰৰ বাবে চৰকাৰৰ পৰা কিছু সহায় কামনা কৰিছে এই ভাস্কৰ্য শিল্পীসকলে ৷
আৰু পঢ়ক : কলিয়াবৰত হাটবৰ কেন্দ্ৰীয় নাট্য সমাজৰ নাট প্ৰদৰ্শন
