বৰপেটা, 24 জানুৱাৰী : নাজিৰাত ভাৰপ্ৰাপ্ত মহকুমাধিপতিৰ দায়িত্বত থকা অতিৰিক্ত উপায়ুক্ত লখিমী দত্তলৈ আগবঢ়োৱা হৈছে শ্ৰেষ্ঠ জিলা নিৰ্বাচনী বিষয়াৰ ৰাজ্যিক বঁটা (Best electoral practice award) ৷ মঙলবাৰে অৰ্থাৎ 25 জানুৱাৰীত ৰাষ্ট্ৰীয় ভোটাৰ দিৱস উপলক্ষে মাছখোৱাৰ আই আই টি সভাগৃহত আয়োজিত বিশেষ অনুষ্ঠানত ৰাজ্যপাল জগদীশ মুখীয়ে লখিমী দত্তক এই বঁটা আগবঢ়াব ৷
জানিব পৰা মতে, বিগত বিধানসভা নিৰ্বাচন পৰিচালনাৰ ক্ষেত্ৰত দেখুওৱা বিশেষ সফলতা আৰু পাৰদৰ্শিতাৰ বাবে অতিৰিক্ত উপায়ুক্ত লখিমী দত্তক এই বঁটাৰ বাবে নিৰ্বাচিত কৰা হৈছে ৷ নিৰ্বাচনৰ সময়ছোৱাত ছবৰীয়া আৰু আঢ়ৈ বছৰীয়া দুই সন্তানক কোলাত লৈ মাতৃত্বৰ দায়িত্বৰ সমান্তৰালভাৱে নিৰ্বাচনী বিষয়া হিচাপে নিজৰ কৰ্তব্য আৰু দায়িত্ব পালন কৰিছিল ৷ বিষয়াগৰাকীৰ কৰ্তব্যনিষ্ঠতা আৰু নিজৰ দায়িত্বৰ প্ৰতি থকা নিয়মানুৱৰ্তীতাক সন্মান জনাই এই বঁটা প্ৰদান কৰা হ'ব বিষয়াগৰাকীক ৷
আনহাতে, লখিমী দত্তৰ সৈতে ৰাজ্যৰ আন তিনিগৰাকী বিষয়া ক্ৰমে বঙাইগাঁওৰ উপায়ুক্ত ডাঃ এম এচ লক্ষ্মীপ্ৰিয়া, যোৰহাটৰ উপায়ুক্ত ৰৌশনী অপৰাঞ্জি আৰু ৰঙিয়াৰ জিলা নিৰ্বাচনী বিষয়া স্বপনীল পালেও এই বঁটাৰ বাবে নিৰ্বাচিত হৈছে ৷
লগতে পঢ়ক : স্থানীয় ব্যক্তি হ’ব মাজুলী সমষ্টিৰ উপ-নিৰ্বাচনৰ প্ৰাৰ্থী !
