বৰপেটাৰোড,3 ডিচেম্বৰ : বুধবাৰে বাক্সা জিলাৰ শালবাৰীত উপস্থিত হয় আলফাৰ প্ৰাক্তন সম্পাদক অনুপ চেতিয়া ৷ এগ্ৰিকাল্চাৰ ফাৰ্মাৰ কোম্পানীৰ প্ৰচাৰ আৰু প্ৰসাৰৰ বাবে উপস্থিত হৈ বিটিচি নিৰ্বাচনক লৈ কেইবাটাও গুৰুত্বপূৰ্ণ মন্তব্য কৰে প্ৰাক্তন আলফা নেতাগৰাকীয়ে ৷ লগতে গণ সুৰক্ষা পাৰ্টীৰ শালবাৰী সমষ্টিৰ প্ৰাৰ্থী চক্ৰধৰ দাসৰ সৈতেও মত বিনিময় কৰে অনুপ চেতিয়াই ৷
উল্লেখ্য় যে, অনুপ চেতিয়াৰ তিনি সহযোগী তথা কেইদিনমান পূৰ্বে বিপিএফত যোগদান কৰা আলফা নেতা সৈত্যেন কলিতা, জোন দাস আৰু চফিকুল ইছলামক গণ সুৰক্ষা পাৰ্টীলৈ উষ্ম আদৰণি জনায় প্ৰাৰ্থী চক্ৰধৰ দাসে । বিটিচি ৰাইজৰ নিজ নিজ অধিকাৰৰ স্বাৰ্থত ভোটদান কৰি জাতি আৰু ভাষাক সুৰক্ষিত কৰাৰ আহ্বান জনায় আলফাৰ প্ৰাক্তন সম্পাদক অনুপ চেতিয়াই ৷
আনহাতে, শ্বহীদ পৰিয়ালৰ দুৰাৱস্থাৰ কথা উল্লেখ কৰি তেওঁ কয় যে, হাগ্ৰামা মহিলাৰী ক্ষমতাত থকাৰ সময়ত এককালীন 1 লাখকৈ টকা শ্বহীদ পৰিয়ালে লাভ কৰিছিল যদিও প্ৰশাসনীয় শাসন ব্যৱস্থাই মৃত্য়ুৰ প্ৰমাণ পত্ৰ বিচৰাৰ ফলত সেই এককালীন সাহাৰ্য শ্বহীদ পৰিয়ালে লাভ কৰাৰ ক্ষেত্ৰত জটিলতাৰ সৃষ্টি কৰিছে ৷ ভৱিষ্যতে ৰাজনীতিলৈ নাহে বুলি স্পষ্টকৈ উল্লেখ কৰি বিটিচিত খিলঞ্জীয়াৰ অধিকাৰ প্ৰতিষ্ঠা হ’ব পৰাকৈ মাত মাতিব পৰা প্ৰাৰ্থীক ভোটদান কৰিবলৈ আহ্বান জনায় আলফাৰ প্ৰাক্তন সম্পাদক অনুপ চেতিয়াই ৷
লগতে পঢ়ক : য়েছে দৰজে ঠংচিলৈ ২০২০ বৰ্ষৰ "চ্যুকাফা বঁটা" প্ৰদান
