জনিয়া,৯ আগষ্ট: ৰাজ্যৰ বিভিন্ন প্ৰান্তৰ প্ৰাথমিক বিদ্যালয়ৰ প্ৰধান শিক্ষকে মধ্যাহ্ন ভোজন তথা বিভিন্ন শিতানত কৰি অহা দুৰ্নীতিৰ খবৰে সংবাদ শিৰোনাম দখল কৰি আহিছে যদিও এতিয়াও একাংশ প্ৰধান শিক্ষকৰ এতিয়াও গা-লৰা নাই । বহু সময়ত মধ্যাহ্ন ভোজনৰ চাউল বিক্ৰী কৰি ৰঙাঘৰৰ আলহী হৈছে দুৰ্নীতিগ্ৰস্ত প্ৰধান শিক্ষক । এইবাৰ পোহৰলৈ আহিছে মন্দিয়া শিক্ষাখণ্ডৰ এখন প্ৰাথমিক বিদ্যালয়ৰ প্ৰধান শিক্ষকৰ দুৰ্নীতিৰ তথ্য ।
মন্দিয়া শিক্ষাখণ্ডৰ অন্তৰ্গত চান্দপুৰ প্ৰাথমিক বিদ্যালয়ৰ প্ৰধান শিক্ষক আবুল কালাম আজাদৰ আজব কাণ্ড । গৰমৰ বন্ধৰ সুযোগ গ্ৰহণ কৰি বিদ্যালয়ত মজুত থকা ১৭ বস্তা মধ্যাহ্ন ভোজনৰ চাউল গোপনে ক'লা বজাৰত বিক্ৰী কৰাৰ অভিযোগ উত্থাপন কৰিছে ৰাইজে । তদুপৰি বিদ্যালয়ৰ শ্ৰেণীকোঠা নিৰ্মাণ আৰু শৌচাগাৰ নিৰ্মাণৰ নামতো সংঘটিত কৰিছে বিয়াগোম দুৰ্নীতি । বিদ্যালয় পৰিচালনা সমিতিৰ সদস্য আৰু সভাপতিক কেৰেপ নকৰি নিজা ময়মতালিৰে চলায় বিদ্যালয় । পৰিচালনা সমিতিক কোনো হিচাপ নিদিয়ে দুৰ্নীতিগ্ৰস্ত প্ৰধান শিক্ষকগৰাকীয়ে ।
লগতে পঢ়ক: Margadarshi cases: মাৰ্গদৰ্শী চিট ফাণ্ড গোচৰৰ শুনানি স্থগিত
আনকি অভিভাৱক ৰাইজে বিদ্যালয়ৰ খবৰ ল'বলৈ আহিলে গেটত তলা লগাই দুৰ্ব্যৱহাৰ কৰাৰ লগতে ভিতৰত প্ৰৱেশ কৰিবলৈ নিদিয়ে প্ৰধান শিক্ষক আবুল কালাম আজাদে । ফলত বুধবাৰে একাংশ ৰাইজে বিদ্যালয়ৰ খবৰ লবলৈ উপস্থিত হয় যদিও প্ৰধান শিক্ষকজনে গেট বন্ধ কৰি প্ৰৱেশ নিষিদ্ধ কৰে । সাংবাদিকৰ দলে ভিতৰত প্ৰৱেশ কৰিব বিচাৰে যদিও গেট খুলি নিদিয়ে দুৰ্নীতিগ্ৰস্ত শিক্ষক আবুল কালাম আজাদে । পিছে ৰাইজৰ এই অভিযোগক বিভাগীয় কৰ্তৃপক্ষই কিদৰে গুৰুত্ব দিয়ে সেয়া অভিভাৱকসকলৰ বাবে এক ডাঙৰ প্ৰশ্ন । নে এনেকৈয়ে দুৰ্নীতিৰে প্ৰধান শিক্ষকগৰাকীয়ে চলাই নিব বিদ্যালয়ৰ কাম-কাজ ।
লগতে পঢ়ক: Oil Palm Tree Plantation: অসমত কিয় প্ৰয়োজন তৈল খেজুৰৰ খেতি,আপ নেতাৰ প্ৰশ্ন
