বৰপেটাৰোড, 5 আগষ্ট : ডকাইতি সংঘটিত হোৱাৰ এদিনৰ পাচতে আৰক্ষীয়ে আটক কৰিলে বাক্সাৰ বাঁহবাৰীত ষ্টেট বেংক অৱ ইণ্ডিয়াৰ এটা গ্ৰাহক সেৱা কেন্দ্ৰৰ ডকাইতিত জড়িত আন এটা ডকাইতক ৷ বাক্সাৰ শালবাৰী মহকুমা আৰক্ষী বিষয়া সমীৰণ বৈশ্যৰ নেতৃত্বত শিমলা, গোৱৰ্দ্ধনা, বাঁহবাৰীৰ আৰক্ষীয়ে অভিযান চলাই অস্ত্ৰসহ গ্ৰেপ্তাৰ কৰে ডকাইতটোক ৷ এটা 7.65 mm পিষ্টল, ছয় জাঁই সজীৱ গুলী, এখন ডেগাৰ আৰু নগদ ৪১,০০০ টকা ডকাইতটোৰ পৰা জব্দ কৰিছে আৰক্ষীয়ে ৷
এই ঘটনাত মুঠ তিনিজন যুৱক জড়িত আছিল ৷ ইয়াৰে বিজিত বড়ো নামৰ ডকাইতটোক বুধবাৰেই আটক কৰিছিল আৰক্ষীয়ে ৷ বৃহস্পতিবাৰে আৰক্ষীৰ জালত পৰে সমৰ সিং নাৰ্জাৰী ৷ আনহাতে, বৰ্তমানেও পলাতক হৈ আছে দলটোৰ আন এঠা ডকাইত ৷
বাঁহবাৰীৰ সমীপৱৰ্তী কুঠৰীঝাৰ ষ্টেট বেংকৰ গ্ৰাহক সুৰক্ষা কেন্দ্ৰটোৰ পৰা দুখন বাইকত অহা তিনিজনীয়া ডকাইতৰ দলটোৱে প্ৰায় 40 লাখ টকা লুট (Money Loot) কৰি নিছিল ৷ অৱশ্যে আৰক্ষীয়ে স্থানীয় লোকৰ সহযোগত লগে লগে অভিযান চলাই এটা ডকাইতক কৰায়ত্ব কৰাৰ লগতে দুখন বাইক জব্দ কৰিবলৈ সক্ষম হয় ৷
আৰক্ষীয়ে ডকাইতটোৰ স্বীকাৰোক্তিৰ ভিত্তিত বৃহস্পতিবাৰে অভিযান চলাই মানাহৰ জংঘলৰ সমীপৰ পৰা সমৰ সিং নাৰ্জাৰী নামৰ আনটো ডকাইতক গ্ৰেপ্তাৰ কৰে ৷ আনহাতে আন এটা পলাতক ডকাইতৰ সন্ধানত আৰক্ষীৰ অভিযান অব্যাহত আছে ৷ শালবাৰীৰ মহকুমা আৰক্ষী বিষয়া সমীৰণ বৈশ্যই বৃহস্পতিবাৰে বাঁহবাৰীত এখন সংবাদমেল আয়োজিত কৰি এই কথা সদৰি কৰে ৷
লগতে পঢ়ক : বাক্সাৰ ষ্টেট বেংক অৱ ইণ্ডিয়াৰ গ্ৰাহক সেৱা কেন্দ্ৰত ডকাইতি
