বাক্সা, 21 আগষ্টঃ বিটিএডিৰ জলসম্পদ বিভাগৰ কাৰ্যবাহী সদস্য মহেশ্বৰ বসুমতাৰীৰ আমন্ত্ৰণ মৰ্মে মঙলবাৰে অসম চৰকাৰৰ জলসম্পদ বিভাগৰ সচিব ৰাজেন দাস, ডেপুতি চেক্ৰেতাৰীৰ লগতে বিভাগটোৰ পলাশ গোস্বামী, বাক্মা জিলাৰ কাৰ্যবাহী অভিযন্তা চামচুল আলামৰ লগতে বহুকেইগৰাকী উচ্চস্তৰীয় বিষয়াই গোৰেশ্বৰ অঞ্চলৰ বেটাগাঁও, মাৰেগাঁও, হাবিবাৰী, জোকমাৰী আদি অঞ্চলৰ পুঠিমাৰী নৈৰ গড়াখহনীয়া আৰু মথাউৰি পৰিদৰ্শন কৰে ।
বিগত বানত পুঠিমাৰী নৈয়ে এই উক্ত অঞ্চল কেইটাত তাণ্ডৱৰ সৃষ্টি কৰাৰ লগতে তীব্ৰ খহনীয়াৰ সৃষ্টি কৰি স্থানীয় জনসাধাৰণক আতংকিত কৰি তুলিছিল । গড়াখহনীয়াৰ কৱলত পৰিছিল শ-শ কৃষিভূমি ৷ পুঠিমাৰী নৈৰ এনে ৰুদ্ৰমূৰ্তি ৰোধ কৰাৰ বাবে অসম চৰকাৰৰ এই উচ্চস্তৰীয় বিষয়াৰ দলটোৱে বিটিএডি ৰ জলসম্পদ বিভাগৰ আমন্ত্ৰণ ৰক্ষা কৰি এই অঞ্চল সমূহ পৰিদৰ্শন কৰে ৷ উচ্চস্তৰীয় বিষয়া সকলে অঞ্চলসমূহ পৰিদৰ্শন কৰি অহা মাৰ্চ মাহৰ ভিতৰত কেবাটাও আঁচনি হাতত লৈ পুঠিমাৰী নৈৰ খহনীয়া আৰু মথাউৰি ৰক্ষা কৰাৰ চেষ্টা কৰিব বুলি জানিবলৈ দিয়ে । বিটিএডিৰ জলসম্পদ বিভাগৰ সদস্য মহেশ্বৰ বসুমতাৰীয়ে এছডিআৰএফ আৰু নাবাৰ্ডৰ আঁচনিৰ জৰিয়তে অঞ্চলটোৰ পুঠিমাৰী নৈৰ খহনীয়া আৰু মথাউৰি মেৰামতি কৰি ৰাইজক উপকৃত কৰিবলৈ অনুৰোধ জনায় । মহেশ্বৰ বসুমতাৰী ডাঙৰীয়াৰ লগতে বিপিএফ দলৰ কেবাগৰাকী নেতা কৰ্মী উপস্থিত থাকে ৷
