বাক্সা, 25 জুলাই : বাক্সা (Baksa) জিলাৰ শালবাৰীৰ আঁওহাটাত ৰহস্যজনকভাৱে মৃত্যু হোৱা চুমি নাথ (Sumi Nath) নামৰ কিশোৰীগৰাকীৰ বাসগৃহত দেওবাৰে উপস্থিত হয় ভৱানীপুৰ সমষ্টিৰ AIUDF বিধায়ক ফনীধৰ তালুকদাৰ (Phanidhar Talukdar) ৷ কিশোৰীগৰাকীৰ ৰহস্যজনক মৃত্যু সন্দৰ্ভত মুখ্যমন্ত্ৰীলৈ স্মাৰক পত্ৰ প্ৰদান কৰে বিধায়কগৰাকীয়ে ৷ যদি এয়া এক হত্যাকাণ্ড, তেন্তে অচিৰেই ঘটনাৰ লগত জড়িত দোষীক শাস্তি প্ৰদান কৰিবলৈ মুখ্যমন্ত্ৰীক আহ্বান জনায় বিধায়ক ফনীধৰ তালুকদাৰে ৷
বিধায়কগৰাকীয়ে পৰিয়ালটোৰ কাষত বহি ঘটনাৰ সবিশেষ বুজ লয় । সংবাদ মাধ্যমৰ আগত তেওঁ কয় যে, চুমি নাথৰ ৰহস্যজনক মৃত্যুৰ ঘটনাৰ উচিত তদন্ত হ’ব লাগে । এই ঘটনাটোক প্ৰশাসনে সাধাৰণভাৱে লোৱা বুলি মন্তব্য কৰে বিধায়কগৰাকীয়ে । তেওঁ কয় যে, ৰাজ্যত ড্ৰাগছ আৰু সুৰাৰ বিৰুদ্ধে চৰকাৰ কঠোৰ হৈছে যদিও এই ঘটনাটোক লৈ ওপৰ মহলাই হেমাহি কৰিছে ৷
অতি কম দিনৰ ভিতৰতে এই ঘটনাৰ সৈতে জড়িত অভিযুক্তই কঠোৰ শাস্তি পাব বুলি আশ্বাস দিয়ে বিধায়কগৰাকীয়ে ৷
উল্লেখ্য যে, বিগত 18 জুলাইৰ সন্ধিয়াৰ ভাগৰ পৰা সন্ধানহীন হৈ আছিল চুমি ৷ সন্ধানহীন হোৱাৰ পূৰ্বৰে পৰাই চুমিৰ ঘৰত নাছিল কোনো লোক । সেই সময়ত পিতৃহাৰা চুমিৰ মাতৃ আৰু ভনীয়েক মোমায়েকৰ ঘৰত আছিল বুলি স্থানীয় লোকে জানিবলৈ দিয়ে ৷ আবেলি ভাগত মোমায়েকৰ ঘৰৰ পৰা উভতি আহি মাক আৰু ভনীয়েকে ঘৰত দেখা পোৱা নাছিল কিশোৰীগৰাকীক ৷
সন্ধিয়ালৈ চুমি ঘৰলৈ উভতি নহাত সন্দেহ হৈছিল মাক-ভনীয়েকৰ ৷ চুমিক বিচাৰি গৈছিল যদিও কোনো সন্ধান লাভ কৰা নাছিল ৷ অৱশেষত 19 জুলাইত আঁওহাটাৰ এটি বোঁৱতী নৈৰ সুঁতিত ৰহস্যজনকভাৱে উদ্ধাৰ হৈছিল কিশোৰীগৰাকীৰ মৃতদেহ ৷
লগতে পঢ়ক : শালবাৰীত কিশোৰীৰ মৃতদেহ উদ্ধাৰ : সন্দেহযুক্ত এজনক আটক
