তামুলপুৰ, 16 ছেপ্টম্বৰ: গোৰেশ্বৰত সংঘটিত হৈছে এক অলৌকিক কাণ্ড (Miraculous incident in Goreswar) ৷ গোৰেশ্বৰৰ বেঙেনাহাটী গাঁৱত এটা গাঁতৰ পৰা অবিৰাম নিৰ্গত হৈছে ধোঁৱা ৷ কোনোৱে কৈছে এক আলৌকিক শক্তি, কোনোৱে কৈছে ভূগৰ্ভত ৰাসায়নিক বিক্ৰিয়া ঘটিছে । আকৌ কোনোৱে কৈছে কোনোবাই চুৰি কৰি অনা চিলিণ্ডাৰ মাটিত পুতি থব পাৰে ইত্যাদি ইত্যাদি ৷
যিমানে সন্ধিয়া হৈ আহিছে সিমানে যেন ৰহস্যৰ আৱৰ্তত সোমাই পৰিছে ঘটনাটো ৷ পৰৱৰ্তী সময়ত ঘটনাস্থলীত প্ৰশাসনৰ লোকৰ লগতে অগ্নিনিৰ্বাপক বাহিনীৰ লোক উপস্থিত হৈ ধোঁৱা নিৰ্গত হোৱা গাঁতটো খান্দে যদিও এইপৰ্যন্ত ফাদিল নহ’ল ৰহস্য ৷ ইফালে গাঁতটোৰ আশে-পাশে থকা মাটিখিনিও গৰম হৈ আহিছে ৷
আনকি ৰহস্য ভেদ কৰিবলৈ বিদ্যুৎ বিভাগৰ কৰ্মচাৰীকো মাতি অনা হ’ল ৷ বিদ্যুৎ বিভাগৰ কৰ্মচাৰী অঞ্চলটোলৈ আহি অঞ্চলটোৰ পৰা বিদ্যুৎ কৰ্তন কৰি গাঁতটোৰ ওচৰতে থকা বিদ্যুতৰ খুঁটাতো অনুসন্ধান কৰিলে যদিও নোলাল এই অলৌকিক কাণ্ডৰ ৰহস্য ৷ বিগত পাঁচদিন ধৰি চলা এই ৰহস্যময়ী ঘটনাৰ প্ৰকৃত সত্য এই পৰ্যন্ত উদঘাটন কৰিব নোৱাৰাত সমগ্ৰ বেঙেনাহাটী গাঁৱত সম্প্ৰতি আতংকৰ সৃষ্টি হৈছে ৷
লগতে পঢ়ক: ২৬ ছেপ্টেম্বৰত ২৪ ঘণ্টীয়া অসম বন্ধ ঘোষণা ছয় জনগোষ্ঠীৰ
