বাক্সা, 6 মে’: ৰাজ্যত প্ৰায় প্ৰতিদিনে বিদ্যুতৰ সঘন লুকাভাকু চলি থকাৰ সময়তে পোহৰলৈ আহিল আন এক আজৱ ঘটনা । একেখন গাঁৱৰে প্ৰায় প্ৰতিঘৰ মানুহৰে বিদ্যুত বিল আহিল 20-30 হেজাৰৰ পৰা 4-5 লাখ টকা । এই আজৱ ঘটনা সংঘটিত হৈছে বাক্সা জিলাৰ মুছলপুৰৰ সমীপৱৰ্তী বন-অহোপা গাঁৱত ।
কৃষিজীৱি গাওঁখনৰ প্ৰায় 99 শতাংশ মানুহৰ ঘৰতেই নাই কোনোধৰণৰ চৰকাৰী চাকৰী অথবা কোনো চকুত লগা ধৰণৰ সা-সুবিধা । বেছিভাগ মানুহেই দিন হাজিৰা কৰি নিজৰ পৰিয়ালটো কোনোমতে পোহপাল দি আছে । কিন্তু কি কাৰণত প্ৰায় 90 শতাংশ দৰিদ্ৰ সীমাৰেখাৰ তলৰ পৰিয়ালত বিদ্যুতৰ মাছুল 4-5 লাখ টকা আহিল, তাকে লৈ হতবাক হৈ পৰিছে এতিয়া গাওঁখনৰ খাটি খোৱা দৰিদ্ৰ লোকসকল ।
গঞা ৰাইজে জানিবলৈ দিয়া যে, বিগত প্ৰায় এবছৰ ধৰি গাওঁখনত বিদ্যুত বিভাগে চলাই আহিছে এইধৰণৰ দুষ্কাৰ্য । ইতিমধ্যে বহু সংখ্যক ব্যক্তিয়ে তেনেকৈয়ে নিজৰ বিদ্যুত মাছুল পৰিশোধ কৰিও আহিছে । কিন্তু যেতিয়াই শেহতীয়াকৈ তেওঁলোকৰ মাছুল 30-40 হেজাৰ টকাৰ পৰা 4-5 লাখ টকা হোৱাত দিশহাৰা হৈ পৰিছে এতিয়া গঞা ৰাইজ ।
