বাক্সা,12 জুনঃ 1বছৰ 2বছৰ নহয়, সম্পূৰ্ণ 17টা বছৰ বিটিচিত শাসন কৰিলে হাগ্ৰামা মহিলাৰী নেতৃত্বাধীন চৰকাৰে ৷ কিন্তু এই 17 টা বছৰত চৰকাৰখনে কিমান উন্নয়ন সাধন কৰিবলৈ সক্ষম হ'ল বিটিএডিত?প্ৰতি বছৰেই কেন্দ্ৰীয় চৰকাৰে বিটিএডিৰ উন্নয়নৰ বাবে কোটি কোটি টকা সাহাৰ্য দিয়ে ৷ কিন্তু সেই টকাৰ কিমান ব্যয় হয় বিটিএডিৰ উন্নয়নত ? মেলে-মিটিঙে উন্নয়নৰ ঢাক-ঢোল বজোৱা হাগ্ৰামা মহিলাৰীৰ উন্নয়নৰ ফোঁপোলা স্বৰূপ পুনৰ পোহৰলৈ আহিল ৷
জানিব পৰা মতে,বাক্সা জিলাৰ জালাহ ৰোডৰ মুছলপুৰ-কুমাৰীকাটা সংযোগী খৈৰাণীৰ পাগলাদিয়া নদীৰ ওপৰত বিটিচি শাসনৰ ১৭টা বছৰেই হাগ্ৰামা মহিলাৰী নেতৃত্বাধীন চৰকাৰে দলং নিৰ্মাণ কৰিবলৈ সক্ষম নহ'ল ৷ এই গুৰুতৰ অভিযোগ বিটিএডি ৰাইজৰ ৷ হাগ্ৰামা মহিলাৰী নেতৃত্বাধীন চৰকাৰৰ হেমাহি আৰু অৱহেলাৰ বাবেই প্ৰতি বছৰেই পাগলাদিয়া নদীৰ বাঢ়নী পানীৰ কবলত পৰি দুৰ্ভোগ ভুগিব লগা হয় ৰাইজে ৷ ইয়াৰ উপৰিও এজন বাইক আৰোহীয়ে নদী পাৰ হোৱাৰ বাবদ এবাৰতে 200 টকাকৈ দিব লগা হোৱাৰ বিপৰীতে চাইকেল আৰোহীয়ে দিব লগা হয় 20 টকাকৈ ৷ যাৰ ফলত দিন হাজিৰা কৰা অঞ্চলটোৰ ৰাইজে বিভিন্ন অসুবিধাৰ সন্মুখীন হ'ব লগা হয় ৷ যাৰ বাবে এতিয়া অঞ্চলটোৰ ৰাইজে সংবাদ মাধ্যমৰ জৰিয়তে শীঘ্ৰে পাগলাদিয়া নদীৰ ওপৰত দলং নিৰ্মাণ কৰিবলৈ দাবী জনায় ।
এতিয়া প্ৰশ্ন হয়,17 টা বছৰেই বিটিএডি উন্নয়নৰ নামত অহা কোটি কোটি টকা প্ৰকৃতাৰ্থত উন্নয়নৰ নামত ব্যয় হ'লনে ? হাগ্ৰামা মহিলাৰীৰ নেতৃত্বত বিটিচি শাসনৰ ১৭ টা বছৰত কিমান উন্নয়ন হ'ল বিটিএডিত ?
