তামুলপুৰ, 8 চেপ্তেম্বৰঃ শনিবাৰে তামুলপুৰত এনআৰচিৰ পৰা ষড়যন্ত্ৰমূলকভাৱে বহিস্কৰণৰ অভিযোগ আনিলে নিখিল বৰ্মন কছাৰী ছাত্ৰ সন্থাই ৷ সংবাদমেলযোগে ছাত্ৰ সন্থাৰ অভিযোগ, ষড়যন্ত্ৰকমূলক ভাৱে বৰ্মন কছাৰী জনজাতিৰ ২৫০০ মানুহৰ নাম বাদ দিয়া হৈছে এনআৰচিৰ সদ্য প্ৰকাশিত তালিকাৰ পৰা ৷ বিয়লি ৪ বজাত তামুলপুৰ প্ৰেছ ক্লাৱত অনুষ্ঠিত এক সংবাদমেলত নিখিল বৰ্মন কছাৰী ছাত্ৰ সন্থাৰ সাধাৰণ সম্পাদক সঞ্জীৱ বৰ্মনে কয় যে অসমৰ স্বীকৃতি প্ৰাপ্ত ১৪ টা জনজাতিৰ ভিতৰত ১৩ টা জনজাতিৰ লোকৰ নাম সদ্য প্ৰকাশিত এন আৰ চিত অন্তৰ্ভুক্ত হয় কিন্তু বৰ্মন কছাৰী জনজাতিৰ প্ৰায় ২৫০০ মানুহৰ নাম এন আৰ চিৰ খচৰাৰ পৰা বাদ দিয়া হৈছে ৷ এন আৰ চিৰ কামত নিয়োজিত একাংশ বিষয়া কৰ্মচাৰীৰ গাফিলতি আৰু চৰকাৰী প্ৰশাসনৰ অবহেলাৰ বাবে বৰ্মন কছাৰীৰ দৰে জনজাতিৰ লোক সকল হাৰাশাস্তিৰ সন্মুখীন হব লগা হৈছে ৷ তেওঁ লগতে কয় যে, নিখিল বৰ্মন কছাৰী ছাত্ৰ সন্থাই আছুকে ধৰি ৩০ টা জনগোষ্ঠীয় সংগঠনৰ লগত অসমত এখন শুদ্ধ এন আৰ চি প্ৰস্তুত হোৱা বাবে কাম কৰি আহিছিল। এন আৰ চি কৰ্তৃপক্ষৰ লগত হোৱা আলোচনাত জনজাতি হিচাপে ১০০ শতাংশ বৰ্মন কছাৰী জনগোষ্ঠীৰ লোকৰ নাম এন আৰ চিত অন্তৰ্ভুক্ত কৰাৰ প্ৰতিশ্ৰুতি প্ৰদান কৰিছিল যদিও এয়া ফুটুকাৰ ফেনত পৰিণত হৈছে । এন আৰ চি কৰ্তৃপক্ষই বৰ্মন কছাৰী জনগোষ্ঠীক বলিৰ পঠাৰ দৰে ব্যৱহাৰ কৰিলে ৷
অন্যান্য জনজাতিৰ দৰে কোনো নথিপত্ৰ নোহোৱাকৈ বৰ্মন কছাৰী সকলক এনআৰচিত অন্তৰ্ভূক্ত কৰাৰ দাবী জনোৱাৰ লগতে এজন বৰ্মন কছাৰীৰ নামো যদি এনআৰচিৰ পৰা বাদ পৰে, তেন্তে তাৰ পৰিণাম ভয়াৱহ হ'ব বুলিও সকিয়াই দিয়ে ছাত্ৰনেতাজনে ৷
