বাক্সা, 28 জুলাইঃ শনিবাৰে নিশা বাক্সাৰ শিমলাগুৰী আৰক্ষীয়ে জব্দ কৰে ইউৰীয়া সাৰ ভৰ্তি দুখন ট্ৰাক৷ পশ্চিমবংগৰ পৰা চালানবিহীনভাৱে কঢ়িয়াই অনা ইউৰিয়া সাৰ ভৰ্তি ট্ৰাকৰ লগতে ট্ৰাকৰ চালককো আটক কৰে শিমলাগুৰী আৰক্ষীয়ে ৷ শনিবাৰে নিশা নাকা চেকিং চলি থকাৰ সময়তে ট্ৰাক দুখন জব্দ কৰিবলৈ সক্ষম হয় আৰক্ষীয়ে ৷ চুবুৰীয়া ৰাজ্য খনৰ পৰা চালান বিহীনভাৱে PB 10 FF 5155 আৰু PB 23 8113 নম্বৰৰ দুখন ট্ৰাকেৰে ইউৰিয়া সাৰ বৰাক উপত্যকাৰ শিলচৰলৈ অবৈধভাৱে কঢ়িয়াই লৈ গৈ থকাৰ অৱস্থাতে জব্দ কৰা হয় ট্ৰাক কেইখন ৷
আনহাতে ৩১ নম্বৰ ৰাষ্ট্ৰীয় ঘাইপথেৰে চালান বিহীনভাৱে কঢ়িয়াই নি থকাৰ সময়ত শিমলাগুৰী আৰক্ষীয়ে উক্ত ইউৰিয়া সাৰৰ চালান বিচাৰে যদিও গাড়ী দুখনৰ চালক দুগৰাকীয়ে উপযুক্ত কাগজ দেখুৱাব নোৱাৰাত আৰক্ষীয়ে ট্ৰাক দুখন জব্দ কৰাৰ লগতে চালককো আটক কৰে ৷ আটকাধীন চালক দুজন ক্ৰমে দালজিৎ সিং আৰু মোখতাৰ সিং ৷ দুয়োগৰাকী চালকৰ ঘৰ পাঞ্জাবৰ লুধিয়ানাত বুলি জানিব পৰা গৈছে ৷ উল্লেখ্য যে যোৱা ২৬ জুলাইত পশ্চিমবংগৰ পৰা JK 02BV 9917 নম্বৰৰ ট্ৰাকেৰে অবৈধভাৱে ৰাষ্ট্ৰীয় ঘাই পথেৰে ২৪ টন ইউৰিয়া সাৰ কঢ়িয়াই শিলচৰলৈ গৈ থকাৰ সময়ত বৰপেটা জিলা পৰিবহণ বিভাগৰ পৰিদৰ্শকেও এখন ট্ৰাক জব্দ কৰিছিল৷
