বাক্সা, ৪ আগষ্টঃ বান আহিল আৰু গ'ল ৷ কিন্তু বানে তচনচ কৰি গ'ল বাক্সাৰ বহু গড়কাপ্তানি পথ ৷ জিলাখনৰ গুৰুত্বপূৰ্ণ গড়কাপ্তানি পথসমূহ বানে বিধ্বস্ত কৰাৰ পিচত এতিয়া যাতায়তৰ ক্ষেত্ৰত যমৰ যাতনা ভুগিছে ৰাইজে৷ বাট-পথৰ বিধ্বস্ত ৰূপে জীয়াতু ভোগাইছে জনতাক। উপায়ন্তৰ হৈ অৱৰ্ণনীয় পৰিস্থিতিৰে মোকাবিলা কৰিছে ৰাইজে।
বাক্সাৰ ভাৰত-ভূটান সীমান্তৰ সূৱণখাটাৰ পকী দলঙৰ ওপৰত এখন বাঁহৰ সাঁকোৰে বিপদজনক যাত্ৰা ৰাইজৰ৷ ভূটানৰ পৰা এৰি দিয়া পানীয়ে সীমান্তৰ সূৱণখাটা- নিকাছী সংযোগী পথৰ দিৰিং নদীৰ পকী দলংখন চিঙি পেলোৱাত এতিয়া যাতায়তৰ বাবে যমৰ যাতনা ভুগিছে ৰাইজে ৷ ইপিনে পকী দলংখনৰ মাজত বাঁহৰ এখন সাঁকো নিৰ্মাণ কৰি যাতায়তৰ সুবিধা কৰি দিলেও বিনিময়ত ভৰিব লাগে জেপৰ ধন ৷ যাৰ বাবে একাংশ লোকে বিপদজনকভাৱে পানীৰ মাজেৰে বাইক আৰু চাৰিচকীয়া বাহন পাৰ কৰিলেও একাংশই জেপৰ ধন দি দলঙৰ ওপৰেৰে যাতায়ত কৰি আহিছে ৷ বিভাগীয় কৰ্তৃপক্ষক অতিশীঘ্ৰে দলংখন মেৰামতি কৰাৰ বাবে আহ্বান জনাইছে ভুক্তভোগী ৰাইজে৷
