বৰপেটাৰোড, 21 জানুৱাৰী : বাক্সা জিলাত চাঞ্চল্যকৰ ঘটনা ৷ মঙলবাৰে বিয়লি বাক্সা জিলাৰ জাখলিবিলত উদ্ধাৰ হয় এটা মৃতদেহ ৷ উদ্ধাৰ হোৱা মৃতদেহটো শিৱসাগৰ জিলাৰ থাওৰা সমষ্টিৰ বৰবাম গাঁৱৰ দূৰ্গা ঘোঁৰাচোৱাৰ পুত্ৰ গুনীন ঘোঁৰাচোৱাৰ বুলি জানিব পৰা গৈছে ৷ যুৱকজনৰ পকেটৰ পৰা উদ্ধাৰ হোৱা পানকাৰ্ড আৰু ভোটাৰ কাৰ্ডৰ পৰা চিনাক্ত কৰা হয় যুৱকজনক ৷
অন্য এক খবৰৰ বাবে :ইৰাকৰ গ্ৰীণ জ'নস্থিত মাৰ্কিন দুতাবাসত ৰকেট আক্ৰমণ
আনহাতে যুৱকজনৰ পকেটৰ পৰা উদ্ধাৰ হয় বঙাইগাঁও ৰেল ষ্টেচনৰ পৰা শিৱসাগৰৰ শিমলুগুৰিলৈ যোৱা এটা ৰেলৰ টিকট ৷ সোমবাৰে বিয়লি ৪ বাজি ৪৪ মিনিটত ৰেলেৰে বঙাইগাঁৱৰ পৰা যাত্ৰা আৰম্ভ কৰা যুৱকজনৰ মৃত্যু কিদৰে হ'ল এই সন্দৰ্ভত বৰ্তমানেও জানিব পৰা হোৱা নাই ৷ বাক্সা জিলাৰ জাখলিবিলৰ ৰেলপথৰ কাষৰ পিটনিত উদ্ধাৰ হয় যুৱকজনৰ মৃতদেহ ৷ মুৰত আঘাতপ্ৰাপ্ত অৱস্থাত উদ্ধাৰ হৈছিল যুৱকজনৰ মৃতদেহ ৷ বাক্সা জিলাৰ দণ্ডাধীশৰ উপস্থিতিত শিমলাগুৰি আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰাৰ পিচতেই যুৱকজনৰ পৰিচয় উদ্ধাৰ হয় ৷ ইতিমধ্যে মৃতদেহটোৰ মৰনোত্তৰ পৰীক্ষাৰ বাবে হাস্পাটাললৈ প্ৰেৰণ কৰাৰ লগতে আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে ৷
