বাক্সাৰ তামুলপুৰত পথ দুৰ্ঘটনা; নিহত ১

শনিবাৰে সন্ধিয়া তামুলপুৰত সংঘটিত হয় এক শোকাবহ পথ দুৰ্ঘটনা ৷ এই দুৰ্ঘটনাটোত এজন বাইক আৰোহীয়ে তামুলপুৰৰ পৰা ৰঙিয়া অভিমুখে গৈ থকা অৱস্থাতে এখন ট্ৰেক্টৰত খুন্দা মৰাৰ ফলত বাইক আৰোহীজন থিতাতে নিহত হয় ৷

বাক্সা,13এপ্ৰিল: বাক্সাৰ তামুলপুৰ থানাৰ অন্তৰ্গত গান্ধীবাৰী আৰক্ষী চকীৰ অন্তৰ্গত ন মাইলত শনিবাৰে সন্ধিয়া সংঘটিত হয় এক পথ দুৰ্ঘটনা । এই শোকাৱহ বাইক দুৰ্ঘটনাত থিতাতে নিহত হয় এজন যুৱক । নিহত যুৱকজন তামুলপুৰ থানাৰ অন্তৰ্গত বৰখোপা গাঁৱৰ নৰেন মজুমদাৰ পুত্ৰ জ্যোতি মজুমদাৰ (২৩) বুলি জানিব পৰা গৈছে ।

তামুলপুৰৰ পৰা ৰঙিয়া অভিমুখে গৈ থকা জ্যোতি মুজুমদাৰে AS01DK9769 নম্বৰ পাল্চাৰ বাইকেৰে গৈ থকা অৱস্থাতে বাইকখনে এখন নম্বৰ বিহীন ট্ৰেক্টৰত খুন্দিৱায় ৷ যাৰফলত সংঘটিত হয় এই পথ দুৰ্ঘটনাটো । ইপিনে ঘটনাস্থলীতে যুৱকজন নিহত হোৱাৰ লগতে বাইকখনত জুই লগাৰ ফলত সম্পূৰ্ণ ৰূপে ভস্মীভূত হয় । আনহাতে ঘটনাস্থলীত তামুলপুৰ আৰক্ষী উপস্থিত হৈ মৃতদেহটো উদ্ধাৰ কৰে ৷