বাক্সা, ১৮ মে': জলসিঞ্চনৰ সুবিধাৰ পৰা বঞ্চিত উত্তৰকুছি অঞ্চল । বাক্সাৰ ভাৰত-ভূটান সীমান্তত অৱস্থিত অঞ্চলটোৰ খেতিয়কসকলে বছৰ বছৰ ধৰি জলসিঞ্চন বিভাগৰ সা-সুবিধাৰ পৰা বঞ্চিত হৈ আহিছে । চৰকাৰৰ জলসিঞ্চন আঁচনিৰ মুখ নেদেখা খেতিয়কসকলে বাৰিষাৰ সময়ত নিজেই ওলাই আহে পাগলাদিয়া নদীত বান্ধ দিবলৈ । অঞ্চলটোৰ মাজেৰেই বৈ যোৱা পাগলাদিয়া নদীত বান্ধ দি কোনোমতে খেতিৰ বাবে যোগাৰ কৰে প্ৰয়োজনীয় পানীখিনিৰ ।
নিজৰ গাঁথিৰ ধন ভাঙি অঞ্চলটোৰ সোঁতৰখন চুবুৰীৰ প্ৰায় সহস্ৰাধিক কৃষকে পালপাতি প্ৰতিবছৰে নদীখনৰ বুকুত কৃত্ৰিমভাৱে বান্ধ নিৰ্মাণ কৰি খেতিপথাৰলৈ পানী বোৱাই নিবলৈ চেষ্টা কৰে । সীমান্তৰ এই কৃষকসকলে এনেদৰেই অতি কষ্টেৰে কোনোমতে কৰি আহিছে কৃষিকৰ্ম ৷ ৰাজ্যত বিয়াগোম জলসিঞ্চন বিভাগ এটা থকাৰ পিচতো বাক্সাৰ এইসকল কৃষকে নিজৰ পেটৰ ভাতমুঠিৰ বাবে এনেদৰে চলাই আহিবলগীয়া হৈছে কঠোৰ সংগ্ৰাম ৷
