বাক্সা, ২৭ ফেব্ৰুৱাৰী: ১৯৯৪ চনতে স্থাপিত ভাৰত-ভূটান সীমান্তৰ মেনকা চাহ বাগিচাৰ এখন বড়ো মাধ্যমৰ বিদ্যালয় ।যিসময়ত নিখিল বড়ো ছাত্ৰসন্থা, বড়ো সাহিত্য সভা আদি সংগঠনসমূহে বড়ো মাধ্যম শিক্ষানুষ্ঠানসমূহৰ উন্নয়নৰদাবী জনাই আহিছে সেই সময়তে এনেদৰে দীৰ্ঘদিন ধৰি অৱহেলিত হৈ পৰি আছে তামুলপুৰ শিক্ষা খণ্ডৰ অন্তৰ্গত বৃহত্তৰ এন চি আঙাৰকাটা (নতুন বস্তি)ৰ শিমলীগুৰী প্ৰাথমিক বিদ্যালয় ।
স্থানীয় ৰাইজে শিক্ষানুষ্ঠানখনৰ মেৰামতিৰ বাবে বহু দিন ধৰি তামুলপুৰ শিক্ষাখণ্ড বিষয়াকআহ্বান জনাই আহিছে যদিও আজি পৰ্যন্ত কোনোধৰণৰ পদক্ষেপ গ্ৰহণ নকৰিলে কৰ্তৃপক্ষই । যাৰ বাবে সচেতন ৰাইজে নিজেই আগবাঢ়ি আহিল বিদ্যালয়খন মেৰামতি কৰিবলৈ । ৪৩ গৰাকীয়ে ছাত্ৰ-ছাত্ৰীৰে বড়ো মাধ্যমৰ পৰিত্যক্ত বিদ্যালয়খন আন্তঃগাঁথনিৰ অভাৱত এবাৰ এজাক ধুমুহা বতাহতে ভাগি পৰিছিল । তাৰ পাচৰে পৰা পুনৰ নিৰ্মাণৰ বাবে কোনোধৰণৰ ব্যৱস্থা নল'লে বিভাগীয় কৰ্তৃপক্ষই । আনহাতে, ৰাইজে প্ৰকাশ কৰা অনুসৰি বিদ্যালয়খনৰ নাতি দূৰতে অৱস্থিত স্থানীয় বিধায়ক ইমানুৱেল মুছাহাৰীৰ বাসগৃহ । তথাপি চকু মুদা কুলিৰ ভাৱত যেন বিধায়কগৰাকীও ।
স্থানীয় লোকসকলে প্ৰকাশ কৰা মতে প্ৰায় ২০ হাজাৰতকৈ অধিক ৰাইজৰ পাৰ দান-বৰঙণি তুলি লগে-ভাগে বিদ্যালয় গৃহটো নিৰ্মাণ কৰাৰ প্ৰয়াস কৰা হৈছিল যদিও সম্পূৰ্ণ কৰিব পৰা হোৱা নাছিল বিদ্যালয়গৃহটো । সম্প্ৰতি, প্ৰধান শিক্ষকগৰাকীয়ে নিজৰ টকাৰেই দিন হাজিৰা লগাই বিদ্যালয়গৃহটো নিৰ্মাণ কৰি আছে ।
বৰ্তমানে প্ৰাথমিক বিদ্যালয়সমূহৰ পাঠদান আৰম্ভ হোৱাৰ এই সময়তে এনেদৰে পাঠদান গ্ৰহণত অসুবিধাত পৰা ছাত্ৰ-ছাত্ৰীসকলৰ ভৱিষ্যতক লৈও চিন্তিত হৈ পৰিছে শিক্ষক-শিক্ষয়িত্ৰীসকলৰ লগতে অভিভাৱকসকলো ।
