স্পৰ্টছ ডেস্ক, 3 ফেব্ৰুৱাৰীঃ সোমবাৰে ৰাজ্যসভাত ভূয়সী প্ৰশংসা ছয়বাৰৰ বিশ্ব চেম্পিয়ন মণিপুৰৰ প্ৰতিভাৱান খেলুৱৈ মহিলা বক্সাৰ মেৰী কমক ৷ পদ্মবিভূষণ আৰু পদ্মভূষণ বঁটাৰে সন্মানিত মেৰী কমক ৰাজ্যসভাৰ সদনত প্ৰশংসা কৰে সভাপতি ভেংকায়া নাইডুৱে ৷
প্ৰাক্তন সদস্য মেৰী কমৰ নাম ঘোষণা কৰি সভাপতিগৰাকীয়ে কয় মেৰী কম কেৱল ছয়বাৰৰ বিশ্ব চেম্পিয়নে নহয় এনে সফলতা অৰ্জন কৰা প্ৰথম মহিলা খেলুৱৈ ৷ ইয়াৰ লগতে নাইডুৱে আশা প্ৰকাশ কৰে, অলিম্পিয়ান মেৰী কমে ভৱিষ্যতে আৰু অধিক সমৃদ্ধি কঢ়িয়াই আনিবলৈ সক্ষম হ’ব ৷
দেশৰ দ্বিতীয় সৰ্বোচ্চ নাগৰিক সন্মান আৰু তৃতীয় সৰ্বোচ্চ নাগৰিক সন্মানেৰে সন্মানিত কৰা হৈছে মেৰী কমক ৷ এই চলিত বৰ্ষৰ জানুৱাৰী মাহত পদ্মবিভূষণৰ সন্মানিত কৰা হয় ছয়বাৰৰ বিশ্ব চেম্পিয়ন মেৰী কমক ৷
উল্লেখ্য যে, 2012 গ্ৰীষ্মকালীন অলিম্পিকত কোৱালিফাই কৰা একমাত্ৰ ভাৰতীয় মহিলা বক্সাৰ হৈছে মেৰী কম ৷ 51 কিলোগ্ৰাম শাখাত প্ৰতিদ্বন্দিতা আগবঢ়াই ব্ৰঞ্জৰ পদক লাভ কৰিবলৈ সক্ষম হৈছিল ৷ ইপিনে 2014 চনৰ এছিয়ান খেলত আৰু 2018 ৰাষ্ট্ৰীয় মণ্ডল খেলত স্বৰ্ণ পদক লাভ কৰা প্ৰথম ভাৰতীয় খেলুৱৈৰ সন্মান লাভ কৰিছিল মেৰী কমে ৷
