স্পৰ্টছ ডেস্ক, 29 ফেব্ৰুৱাৰীঃ আঠ বছৰৰ বাবে নিষিদ্ধ ঘোষিত হ’ল স্বৰ্ণ জয়ী অলিম্পিক খেলুৱৈ চীনৰ সাঁতুৰবিধ চুন য়াং৷ তিনিবাৰৰ অলিম্পিক বিজয়ী সাঁতুৰবিদগৰাকীয়ে ড'পিং টেষ্টৰ বাবে নমুনা নিদিয়াৰ বাবেই দোষী সাব্যস্ত কৰি আদালতে 8 বছৰৰ নিষেধাজ্ঞা জাপি দিয়ে খেলুৱৈগৰাকীৰ ওপৰত ৷ প্ৰথমে সাঁতুৰৰ গভৰ্ণিং বডী ফিনাই ড'পিঙৰ অপৰাধৰ পৰা মুকলি কৰিছিল যদিও বিশ্ব এণ্টি ড'পিং এজেঞ্চিৰ আৱেদনৰ পিচত আদলতে খেলুৱৈগৰাকীৰ ওপৰত নিষেধাজ্ঞা জাৰি কৰে ৷ ইয়াৰ লগে-লগে আগন্তুক টকিঅ’ অলিম্পিকৰ পৰাও বাহিৰ হ’বলগীয়া হৈছে খেলুৱৈগৰাকী ৷
খেলুৱৈগৰাকীয়ে 2018 বৰ্ষৰ ছেপ্তেম্বৰ মাহত ড'পিং টেষ্টৰ বাবে মুত্ৰ আৰু তেজৰ নমুনা দিবলৈ অমান্তি হৈছিল ৷ যাৰ বাবে খেলুৱৈগৰাকীক 8 বছৰৰ নিষেধাজ্ঞা জাৰি কৰা হয় ৷
এই নিষেধজ্ঞা লাভ কৰাৰ পাচতে টকিঅ’ অলিম্পিকৰ 200 মিটাৰ ফ্ৰী ষ্টাইল খিতাপ অক্ষুণ্ণ ৰাখিবলৈ অনুমতি লাভ কৰাত বিফল হৈছে খেলুৱৈগৰাকী৷ বৰ্তমান এই নিষেধজ্ঞাৰ বিৰুদ্ধে খেলুৱৈগৰাকীয়ে ন্যায়ালয়ত আৱেদন দাখিল কৰিব বুলি জানিব পৰা গৈছে ৷ খেলুৱৈগৰাকীয়ে নিজকে নিৰ্দোষী ঘোষণা কৰি কয়, এই নিষেধজ্ঞাৰ বিৰুদ্ধে তেওঁ আৱেদন জনাব যাতে সকলোৰে মাজত সত্য পোহৰলৈ আহে ৷ ইয়াৰ পূৰ্বেও 2014 চনত ডোপিং টেষ্টত বিফল হৈ নিষিদ্ধ ঘোষিত হৈছিল খেলুৱৈগৰাকী ৷ এতিয়া পুনৰ 8 বছৰৰ নিষেধাজ্ঞা লাভ কৰাৰ পাচত খেলুৱৈগৰাকীৰ কেৰিয়াৰৰ অন্ত পৰিল বুলি অনুমান কৰিছে বিভিন্ন মহলে ৷ উল্লেখ্য যে,অলিম্পিকত স্বৰ্ণ পদক লাভ কৰা চীনৰ প্ৰথমগৰাকী সাঁতুৰবিধ হৈছে চুন য়াং ৷
2012 চনত লণ্ডন অলিম্পিকত 400 মিটাৰ আৰু 1500 মিটাৰ ফ্ৰী ষ্টাইলত, 2016 চনত ৰিঅ’ অলিম্পিকৰ 200 মিটাৰ ফ্ৰী ষ্টাইলত স্বৰ্ণ পদক লাভ কৰিবলৈ সক্ষম হৈছিল খেলুৱৈগৰাকীয়ে ৷ অলিম্পিকত মুঠ 6 টা , বিশ্ব চেম্পিয়নশ্বিপত 16 টা আৰু এছিয়ান গেমছত 14 টা পদক লাভ কৰিবলৈ সক্ষম হৈছে চীনৰ চুন য়াঙে ৷
