স্পৰ্টছ ডেস্ক, 13 অক্টোবৰঃ সমাপ্ত হ’ল ৰাছিয়াৰ উলান উদেত অনুষ্ঠিত হোৱা বিশ্ব মহিলা বক্সিং চেম্পিয়নশ্বিপৰ ৷ এই চেম্পিয়নশ্বিপত ভাৰতৰ সুন্দৰ প্ৰদৰ্শন ৷ আঁজুৰি আনিলে মুঠ চাৰিটাকৈ পদক ৷ য’ত তিনিটা ব্ৰঞ্জ পদকৰ লগতে আছে এটা ৰূপৰ পদক ৷ টুৰ্ণামেণ্টখনৰ অন্তিমটো দিনত অৰ্থাৎ দেওবাৰে ৰূপৰ পদক জয় কৰিবলৈ সক্ষম হয় ভাৰতৰ যুৱ বক্সাৰ মঞ্জু ৰাণীয়ে ৷ 48 কিলোগ্ৰাম শাখাৰ ফাইনেল মেচত ৰাছিয়াৰে খেলুৱৈ একাতেৰিনা পাল্টছেৱাৰ হাতত 4-1 ৰ ব্যৱধানত পৰাস্ত হয় মঞ্জু ৷
উল্লেখ্য যে, শনিবাৰে খেলুৱৈগৰাকীয়ে নিজৰ অভিষেক মেচতেই বিশ্ব মহিলা বক্সিং চেম্পিয়নশ্বিপৰ ফাইনেলত প্ৰৱেশ কৰিয়ে অভিলেখ গঢ়িবলৈ সক্ষম হৈছিল ৷ ইয়াৰ পূৰ্বে 2001 চনত অভিষেক মেচতে বিশ্ব চেম্পিয়নশ্বিপৰ ফাইনেলত প্ৰৱেশ কৰিছিল মেৰী কমে ৷
মঞ্জুৰ লগতে এই চেম্পিয়নশ্বিপত ভাৰতৰ হৈ শনিবাৰে তিনিটা ব্ৰঞ্জৰ পদক বুটলি আনিবলৈ সক্ষম হৈছিল মণিপুৰৰ বক্সাৰ মেৰী কমৰ লগতে অসমৰ দুই কন্যা যমুনা বড়ো আৰু লাভলিনা বৰগোঁহাইয়ে ৷
শনিবাৰে অনুষ্ঠিত ছেমিফাইনেলৰ 51 কিলোগ্ৰাম শাখাত তুৰ্কীৰ খেলুৱৈ বাছনাজ কাকিৰ’গ্লুৰ হাতত 4-1 ব্যৱধানত পৰাস্ত হৈ ব্ৰ'ঞ্জৰ পদকতে সন্তুষ্ট থাকিবলগীয়া হৈছিল ছয়বাৰৰ বিশ্বচেম্পিয়ন মেৰী কমে ৷ অৱশ্যে বিশ্ব বক্সিং চেম্পিয়নশ্বিপত মেৰী কমৰ এইটো আছিল অষ্টমটো পদক ৷
ইপিনে 54 কিলোগ্ৰাম শাখাত চাইনিছ তাইপাই খেলুৱৈৰ হাতত 5-0 ব্যৱধানত যমুনা বড়ো আৰু 69 কিলোগ্ৰাম শাখাত চীনৰ য়াং লিওৰ হাতত 2-3 ব্যৱধানত লাভলিনা বৰগোঁহাইয়ে পৰাস্ত হৈ ব্ৰঞ্জৰ পদক লাভ কৰিবলৈ সক্ষম হৈছিল ৷
