স্পৰ্টছ ডেস্ক, 25 জুন : 1983 চনৰ 25 জুনৰ দিনটোতে টীম ইণ্ডিয়াই বিশ্বকাপ খিতাপ দখল কৰি ক্ৰিকেট ইতিহাসত বিশ্বকাপ দখলকাৰীৰ তালিকাত নিজৰ নাম সন্নিবিষ্ট কৰিছিল ৷ কপিল দেৱৰ নেতৃত্বত ভাৰতে ৱেষ্ট ইণ্ডিজক 43 ৰাণত পৰাস্ত কৰি বিশ্বকাপ খিতাপ হাতত তুলি লোৱা 36 টাকৈ বছৰ সম্পূৰ্ণ হ'ল ৷
36 বছৰ সম্পূৰ্ণ হোৱা বাবে ভাৰতীয় ক্ৰিকেট ব'ৰ্ডে দলটোৰ বিশ্বকাপজয়ী অধিনায়ক কপিল দেৱে বিশ্বকাপ তুলি লোৱা এখন ফ'টো টুইটাৰত শ্বেয়াৰ কৰে ৷
বিশ্বকাপজয়ী ভাৰতৰ 11 জনীয়া দলটোত আছিল কপিল দেৱ, সুনীল গাভাস্কাৰ, কে. শ্ৰীকান্ঠ, মহিন্দৰ অমৰনাথ, য়শপাল শৰ্মা, এছ. এম. পাটিল, কীৰ্তি আজাদ, ৰ'জাৰ বিন্নী, মদন লাল, ছৈয়দ কিৰমানি, আৰু বলবিন্দৰ সন্ধু ৷
বিশ্বকাপ ইতিহাসৰ প্ৰথম দুটা খিতাপ 1975 আৰু 1979 চনত ৱেষ্টইণ্ডিজে দখল কৰিবলৈ সক্ষম হৈছিল ৷ ভাৰতীয় দলে 1983 চনৰ উপৰি 28 বছৰৰ অন্তত 2011 চনত বিশ্বকাপ খিতাপ পুনৰ তুলি লৈছিল ৷
উল্লেখ্য যে, বিশ্বকাপ ক্ৰিকেট, 2019 ত ভাৰতে এখনো মেচত পৰাস্ত নোহোৱাকৈ 9 পইন্ট সংগ্ৰহেৰে পইন্ট তালিকাৰ তৃতীয় স্থানত আছে ৷ জুনৰ 27 তাৰিখে ভাৰতে ৱেষ্ট ইণ্ডিজৰ বিৰুদ্ধে যুঁজত নামিব ৷
