নিউজ ডেস্ক, 28 এপ্ৰিলঃ আন্তঃৰাষ্ট্ৰীয় ক্ৰিকেট পৰিষদ (ICC)য়ে বৃহস্পতিবাৰে মুখ্য কাৰ্যবাহী সমিতিৰ বৈঠক আয়োজন কৰিছিল, কিন্তু চলিত বৰ্ষতেই অষ্ট্ৰেলিয়াত অনুষ্ঠিত হ'বলগীয়া T20 বিশ্বকাপ সম্পৰ্কে প্ৰদান কৰা নাই কোনো স্পষ্ট মত ।
ইপিনে অক্টোবৰ-নবেম্বৰত অনুষ্ঠিত হ'ব লগীয়া এই প্ৰতিযোগিতাখন অনুষ্ঠিত কৰাটো কৰ'ণা ভাইৰাছৰ প্ৰকোপ আৰু প্ৰভাৱে অবাস্তৱিক কৰি তুলিছে বুলি অনুভৱ কৰিছে ভাৰতীয় ক্ৰিকেট নিয়ন্ত্ৰণ বৰ্ড চমুকৈ BCCI-য়ে ।
এক সংবাদ এজেন্সীৰ আগত BCCIৰ বিষয়া এগৰাকীয়ে জনোৱা অনুসৰি কৰ'ণা ভাইৰাছৰ লগত বিভিন্ন আনুসংগিক কাৰকে আয়োজনত প্ৰভাৱ পেলাব । তাৰে ভিতৰত অন্যতম হ'ল বিভিন্ন দেশে জাৰি কৰা ভ্ৰমণ বাতিলৰ নিৰ্দেশনা সমূহ । লগতে পৰিস্থিতি পূৰ্বৰ দৰে স্বাভাৱিক নহোৱালৈ ভ্ৰমণ কৰাটো উচিত নহয় । সেয়ে বিশ্বকাপ অনুষ্ঠিত হোৱাটো প্ৰায়োগিক ক্ষেত্ৰত অবাস্তৱিক হৈ পৰিছে বুলি বিষয়া জনে কয় ।
এনে বৃহৎ আয়োজনৰ বাবে যদি ক্ষতি হয় তাৰ বাবে ক্ৰিকেট অষ্ট্ৰেলিয়া আৰু ICC য়ে দায়িত্ব লবলৈ সাজু হ'বনে নাই এই বিষেয়ও প্ৰশ্ন উত্থাপন হ'ব বুলি বিষয়া গৰাকীয়ে উল্লেখ কৰে ।
লগতে বিষয়া জনে অষ্ট্ৰেলিয়াৰ চৰকাৰে অনুমতি দিবনে নাই আৰু অনুমতি প্ৰদানৰ পাচতো বাকী দেশৰ খেলুৱৈক ভ্ৰমণৰ বাবে সেই দেশৰ চৰকাৰে অনুমতি দিবনে নাই তাকে লৈ প্ৰশ্ন কৰে । আনহাতে দৰ্শক বা ক্ৰিকেট অনুৰাগীৰ স্বাস্থ্যও গুৰুত্বপূৰ্ণ বুলি উল্লেখ কৰি তেওঁলোকৰ বাবে ষ্টেডিয়ামত সামাজিক দূৰত্ব বৰ্তাই ৰখাটো সম্ভৱনে বুলি প্ৰশ্ন কৰে তেওঁ ।
