স্পৰ্টছ ডেস্ক, 11 ফেব্ৰুৱাৰী : নিউজিলেণ্ডৰ হাতত এদিনীয়া শৃংখলা হোৱাইট ৱাশ্বৰ সন্মুখীন হ'ল ভাৰতীয় দল ৷ টি-20 শৃংখলাত নিউজিলেণ্ডক হোৱাইট ৱাশ্ব কৰাৰ পাচত এদিনীয়া শৃংখলাত হোৱাইট ৱাশ্ব হয় ভাৰতীয় দল ৷ মঙলবাৰে বে অ'ভেলত অনুষ্ঠিত তৃতীয় এদিনীয়াত 5 উইকেটত পৰাস্ত হয় ভাৰতীয় দলটো ৷
ভাৰতে বান্ধি দিয়া 297 ৰাণৰ লক্ষ্য অনুসৰণ কৰি নিউজিলেণ্ড দলে হেনৰী নিকলছ (80) আৰু কলিন ডি গ্ৰেণ্ডহোমৰ (58) সুন্দৰ বেটিঙৰ জৰিয়তে পাঁচ উইকেট হেৰুৱাই জয়ৰ লক্ষ্যত উপনীত হয় ৷ অ'পেনাৰদ্বয় মাৰ্টিন গুপটিল আৰু হেনৰী নিকলছেও প্ৰথম উইকেটৰ যুটীত 106 ৰাণৰ পাৰ্টনাৰশ্বিপ গঢ়ে ৷ ভাৰতৰ হৈ য়ুজবেন্দ্ৰ চাহালে 47 ৰাণ খৰচ কৰি 3 টাকৈ উইকেট দখল কৰে ৷
প্ৰথমে বেটিঙৰ আমন্ত্ৰণ লাভ কৰি ভাৰতীয় দলে ভাল আৰম্ভণি কৰিবলৈ সক্ষম নহয় ৷ মায়ংক আগৰৱাল (1) আৰু বিৰাট কোহলীয়ে (9) ৰাণ কৰি উইকেট হেৰুৱায় ৷ আনহাতে, অ'পেনাৰ পৃথ্বী শ্ব'য়ে 40 ৰাণ কৰি আউট হোৱাৰ ফলত ভাৰতে 62 ৰাণতে 3 টাকৈ উইকেট হেৰুৱায় ৷ ইয়াৰ পাচতে শ্ৰেয়াস আয়াৰ আৰু কে. এল. ৰাহুলে বেটিং কৰিবলৈ নামি 100 ৰাণৰ পাৰ্টনাৰশ্বিপ গঢ়িবলৈ সক্ষম হয় ৷ শ্ৰেয়াসে 62 ৰাণ কৰি জিম্মী নিছামৰ হাতত নিজৰ উইকেট হেৰুৱায় ৷ ৰাহুলে মনিশ পাণ্ডেৰ সৈতে দলৰ দায়িত্বভাৰ গ্ৰহণ কৰি শতক অৰ্জন কৰে ৷ ৰাহুলে 112 ৰাণ সংগ্ৰহ কৰাৰ লগতে পাণ্ডেই 42 ৰাণ সংগ্ৰহ কৰে ৷ নিউজিলেণ্ডৰ হৈ হামিছ বেনেটে 64 ৰাণ খৰছ কৰি 4 টা উইকেট দখল কৰে ৷
উল্লেখ্য যে, এদিনীয়া শৃংখলা অন্ত পৰাৰ পাচতে দুয়ো দলে 21 ফেব্ৰুৱাৰীৰ পৰা দুখনীয়া টেষ্ট শৃংখলাত অংশগ্ৰহণ কৰিব ৷
আৰু পঢ়ক : তৃতীয় এদিনীয়াঃ টছত জয় লাভ নিউজিলেণ্ডৰ, প্ৰথমে বেটিং ভাৰতৰ
