নিউজ ডেস্ক, 12 জুলাইঃ প্ৰাক্তন ভাৰতীয় ক্ৰেকেটাৰ তথা বৰ্তমানৰ সাংসদ গৌতম গম্ভীৰে মহেন্দ্ৰ সিং ধোনীৰ সৈতে কটোৱা সময়ৰ স্মৃতি ৰোমন্থন কৰে ৷ তেওঁ ধোনীৰ ছুলী দীঘল হৈ থকাৰ সময়ৰ কথা মনত পেলাই, যেতিয়া ধোনী আৰু গম্ভীৰ একেটা ৰুমতে ডেৰমাহ সময় একেলগে কটাইছিল ৷
গম্ভীৰে কয় যে, প্ৰায়ে তেওঁলোকে ধোনীৰ ছুলীৰ বিষয়ে আলোচনা কৰিছিল ৷ কেনেদৰে দীঘল ছুলী ধোনীয়ে নিয়ন্ত্ৰণ কৰি ৰাখে তাকেলৈ চলিছিল আলোচনা ৷ আনহাতে প্ৰথম সপ্তাহত তেওঁলোকক থাকিবলৈ দিয়া কোঠাতো বহুত সৰু আছিল ৷ যাৰ বাবে কোঠাটোত খালী ঠাই উলিয়াবলৈ তেওঁলোক দুয়োজনে তাত থকা বিছনা কেইখন আঁতৰাই মজিয়াত শুৱাৰ সিদ্ধান্ত লৈছিল ৷ সেই সময়খিনিত দুয়োগৰাকী খেলুৱৈ যুৱ আছিল আৰু সেয়ে সেই সময়খিনি অতিকে স্মৰণীয় বুলি উল্লেখ কৰে গম্ভীৰে ৷
আনহাতে দক্ষিণ আফ্ৰিকাৰ প্ৰাক্তন অধিনায়ক তথা বৰ্তমান আফ্ৰিকান ক্ৰিকেট বৰ্ডৰ সঞ্চালক গ্ৰেম স্মিথে কয় যে, বিশ্ব ক্ৰিকেটত এনে এজন বৰ্তমামৰ খেলুৱৈ পোৱাটো কঠিন যিয়ে ধোনীৰ সান্নিধ্য পোৱা নাই ৷
ধোনীয়ে 2004 চনত বাংলাদেশৰ বিৰুদ্ধে আন্তঃৰাষ্ট্ৰীয় ক্ৰিকেটত অভিশেষ ঘটাইছিল ৷ তেওঁ এতিয়ালৈ 90 খন টেষ্ট, 350 খন এদিনীয়া, আৰু 98 খন টি-20 খেল খেলিছে ৷ ধোনীয়ে আন্তঃৰাষ্ট্ৰীয় ক্ৰিকেটত সংগ্ৰহ কৰিছে 17 হাজাৰৰো অধিক ৰান ৷ 2019 ক্ৰিকেট বিশ্বকাপৰ ছেমি-ফাইনেলখনৰ পাচত ধোনীক খেলপথাৰত দেখিবলৈ পোৱা নায় ৷ ধোনীৰ বহু অনুগামীয়ে খেলপথাৰত তেওঁক দেখাৰ গভীৰ আশাৰে বাট চাই আছে ৷
