স্পৰ্টছ ডেস্ক, 8 ছেপ্তেম্বৰ : থমাছ উবাৰ কাপত অংশগ্ৰহণ কৰিব তাৰকা শ্বাটলাৰ পি. ভি. সিন্ধুয়ে ৷ সোমবাৰে এই কথা নিশ্চিত কৰে ভাৰতীয় বেডমিন্টন এচ'ছিয়েচনৰ (BAI)সভাপতি হিমন্ত বিশ্ব শৰ্মাই ৷ উল্লেখ্য যে, পূৰ্বে সিন্ধুয়ে প্ৰতিযোগিতাত অংশগ্ৰহণৰ পৰা বিৰত থাকিব বুলি মন্তব্য় কৰিছিল যদিও হিমন্ত বিশ্ব শৰ্মাৰ অনুৰোধত অংশগ্ৰহণৰ সিদ্ধান্ত গ্ৰহণ কৰে ৷
শৰ্মাই টুইটাৰৰ জৰিয়তে কয়, "মই পি. ভি. সিন্ধুক প্ৰতিযোগিতাত অংশগ্ৰহণ কৰিবলৈ অনুৰোধ জনাইছিলো যিহেতু আমি ড্ৰ' খেলিছো আৰু মেডেল জিকাৰ সম্পূৰ্ণ সুযোগ আছে ৷ তেওঁ মোৰ অনুৰোধত সন্মতি জনাইছে আৰু দেশৰ বাবে খেলিবলৈ তেওঁ পৰিয়ালৰ অনুষ্ঠান পূৰ্বেই অনুষ্ঠিত কৰিব বুলি জানিবলৈ দিয়ে ৷"
উল্লেখ্য যে, থমাছ আৰু উবাৰ কাপ, 2020 ডেনমাৰ্কৰ আৰহাছত 3 অক্টোবৰৰ পৰা 11 অক্টোবৰলৈ অনুষ্ঠিত হ'ব ৷ বিশ্ব চেম্পিয়ন শ্বাটলাৰগৰাকীয়ে যোৱা মাহৰ পৰা পুনৰ অনুশীলনত অংশগ্ৰহণ কৰিছিল ৷
শনিবাৰে বেংক অৱ বৰোডাৰ এক অফিচিয়েল একাউন্টৰ পৰা ইনষ্টাগ্ৰাম লাইভৰ জৰিয়তে সিন্ধুয়ে কৈছিল যে, তেওঁ পিতৃৰ দ্বাৰা অনুপ্ৰাণিত হৈ ক্ৰীড়াক্ষেত্ৰখন বাছি লৈছিল আৰু তেওঁ কেতিয়াও সিন্ধুৰ পছন্দত প্ৰশ্ন কৰা নাছিল ৷
ক্ৰীড়াবিদ নোহোৱা হ'লে তেওঁ কি পেছা গ্ৰহণ কৰিলেহেঁতেন বুলি সোধা প্ৰশ্নৰ উত্তৰত তেওঁ কয় যে, শিশুকালত তেওঁ চিকিৎসক হ'ব বিচাৰিছিল ৷
