নিউজ ডেস্ক,৩০জুলাই: বুধবাৰে ছবি পৰিচালক এচ এচ ৰাজামৌলিয়ে জনালে যে, তেওঁৰ লগতে পৰিয়ালৰ সকলোৰে দেহত কোভিড-১৯ পজিটিভ ধৰা পৰাৰ পিছত সকলোৱে এতিয়া হোম কোৱাৰেণ্টাইনত আছে ।
চুপাৰহিট বাহুবলী পৰিচালনাৰে সকলোৰে অধিক পৰিচিত হৈ পৰা এচ এচ ৰাজামৌলিৰ সামান্য জ্বৰ হোৱাৰ বাবে তেওঁ কোভিডৰ পৰীক্ষা সম্পন্ন কৰিছিল । অৱশ্যে পৰিচালক গৰাকীৰ পৰিয়ালৰ আন সকল সদস্যও জ্বৰত আক্ৰান্ত হৈছিল বুলি জনালে এচ এচ ৰাজামৌলিয়ে ।
অৱশেষত আটাইৰে ক'ভিড-১৯ৰ পৰীক্ষাৰ ফলাফল পজিটিভ আহিল । বৰ্তমান চিকিৎসকৰ পৰামৰ্শ অনুযায়ী ৰাজামৌলি আৰু পৰিয়ালৰ আন সকল সদস্য হোম কোৱাৰিণ্টাইনত থকাৰ কথা টুইটযোগে জনালে পৰিচালক গৰাকীয়ে ।
আন এটা টুইটত ৰাজামৌলিয়ে উল্লেখ কৰিছে তেওঁৰ লগতে পৰিয়ালৰ সকলোৰে দেহত ভাইৰাছৰ উপস্থিতিৰ লক্ষণ ধৰিব পৰা নাই যদিওঁ সকলোৱে স্বাস্থ্য বিভাগৰ নিৰ্দেশাৱলীৰ লগতে সাৱধানতা অৱলম্বন কৰি হোম কোৱাৰেণ্টাইনত আছে ।
'আমি এতিয়া শৰীৰত এণ্টিবডি বৃদ্ধি হ'বৰ বাবে অপেক্ষা কৰিছো যাতে আমাৰ প্লাজমা আনক দান কৰিব পাৰো ।' ৰাজামৌলিয়ে টুইটত এইদৰে উল্লেখ কৰিলে ।
মাৰ্চ মাহত সমগ্ৰ দেশতে ঘোষণা কৰা ল'ক ডাউনৰ পূৰ্বে পৰিচালক গৰাকীয়ে তেখেতৰ আহিব লগা নতুন ছবি 'Rise Roar Revolt' ৰ নিৰ্মাণৰ কাম কৰি আছিল । দাক্ষিণাত্যৰ চুপাৰ ষ্টাৰ ৰাম চৰণ আৰু এনটিআৰ জুনিয়ৰে অভিনয় কৰা এই টেলেগু ছবিখন বিংশ শতাব্দীৰ প্ৰথমচোৱাৰ দুজন স্বাধীনতা সংগ্ৰামীৰ জীৱন আধাৰিত এটা কল্প কাহিনীৰ ওপৰত নিৰ্মাণ কৰা হৈছে ।
মন কৰিব লগীয়া যে, বুধবাৰৰ এটা দিনৰ ভিতৰতে অন্ধ্ৰ প্ৰদেশত ক'ৰণাৰ আক্ৰান্ত লোকৰ সংখ্যা হ'ল ১০ হেজাৰৰো অধিক । তাৰোপৰি তামিলনাডু, কৰ্ণাটককে ধৰি দক্ষিণ ভাৰতৰ ৰাজ্য সমূহত দৈনিক আক্ৰান্তৰ সংখ্যা বৃদ্ধি হোৱা দেখা গৈছে যদিওঁ গড় হিচাবত সংক্ৰমণ সামান্য কমি অহা পৰিলক্ষিত হৈছে ।
বুধবাৰলৈকে তামিলনাডু, কৰ্ণাটক, টেলেংগানা, কেৰেলা, কেন্দ্ৰীয় শাসিত অঞ্চল পণ্ডিচেৰীকে ধৰি দক্ষিণ ভাৰতৰ ৰাজ্য সমূহত ক'ভিড-১৯ত আক্ৰান্তৰ সংখ্যা হৈছে ২৪,৮৫৫ ।
