মই ইৰফান খানক পাপা নহ'লে ডেড মাতিছিলোঃ ৰাধিকা মাদান

তিনি মাহ বাগৰিল প্ৰসিদ্ধ অভিনেতা ইৰফান খানৰ মৃত্যুৰ ৷ তেওঁৰ শেষৰখন ছবিত তেওঁৰ সৈতে একলেগে অভিনয় কৰিছিল অভিনেত্ৰী ৰাধিকা মাদানে ৷ শেহতীয়াকৈ অভিনেত্ৰী গৰাকীয়ে ইৰফান খানৰ সৈতে কাম কৰা সময়ৰ অনুভৱ ব্যক্ত কৰে ৷

চিটাৰা ডেস্ক,2 আগষ্টঃ প্ৰসিদ্ধ অভিনেতা ইৰফান খানৰ মৃত্যুৱে তিনিটা মাহ সম্পূৰ্ণ কৰিলে ৷ ইৰফান খানৰ অন্তিমখন ছবি আংৰেজী মিডিয়ামত একলেগে অভিনয় কৰিছিল অভিনেত্ৰী ৰাধিকা মাদানে ৷

ইৰফান খানৰ সৈতে ৰাধিকা মাদান

ছবিখন শ্বুটিং কৰাৰ সময়খিনিত ইৰফান খানৰ সৈতে থকা স্মৃতি শ্বেয়াৰ কৰে অভিনেত্ৰী ৰাধিকা মাদানে ৷ ছবিখনত ইৰফান খানে ৰাধিকাৰ পিতৃৰ চৰিত্ৰ ৰূপায়ন কৰিছিল ৷ দুয়োৰে মাজৰ সম্বন্ধৰ কথা শ্বেয়াৰ কৰি অভিনেত্ৰী গৰাকীয়ে কয় যে তেওঁ সদায় ইৰফান খানক পাপা নহ'লে ডেড বুলি সম্বোধন কৰিছিল ৷

ৰাধিকা মাদানে কয়," মই কেতিয়াও তেওঁক ছাৰ বুলি সম্বোধন কৰা নাছিলো ৷ মই সদায় তেওঁক পাপা নহ'লে ডেড বুলি সম্বোধন কৰিছিলো ৷ তেওঁ মাত্ৰ মিচিকিয়া হাঁহি মাৰি দিয়ে ৷ মোৰ এতিয়াও মনত আছে, যেতিয়া মই প্ৰথমবাৰ তেওঁক ডেড বুলি মাতিছিলো ৷ তেতিয়া তেওঁ অদ্ভুত অনুভৱ কৰাৰ সলনি মোক সাৱটি ধৰিছিল ৷ মই সদায় তেওঁক পিতৃ ৰূপতে মনত ৰাখিম ৷"

ইৰফান খানৰ সৈতে ৰাধিকা মাদান

লগতে কয়, "মই বহুত কৃতজ্ঞ যে, মই তেওঁৰ সৈতে থিয় হোৱা আৰু একেলগে স্ক্ৰীণ শ্বেয়াৰ কৰাৰ সুবিধা লাভ কৰিলো ৷ মই এগৰাকী শিল্পী আৰু এজন ব্যক্তি হিচাপে তেওঁৰ পৰা বহুত শিকিলো ৷ "

লগতে পঢ়কঃকন্যা সন্তানৰ পিতৃ হ'ল অভিনেতা আফতাব শিভদাচানী