দলগাঁও, 19 অক্টোবৰ : দৰং জিলাৰ দলগাঁৱত ভতিজাৰ দাৰ ঘাপত প্ৰাণ গল খুড়াকৰ । দলগাঁৱৰ বিলপাৰত সংঘটিত হৈছে এই ঘটনা ৷ পাৰিবাৰিক কাজিয়াৰ কৰুণ পৰিণতিত উক্ত ঘটনা সংঘটিত হোৱাৰ অভিযোগ ৷
তথ্য অনুসৰি, দৰঙৰ দলগাঁও থানাৰ অন্তৰ্গত বিলপাৰ গাঁৱত ভতিজাক জয়নাল আব্দিনে পাৰিবাৰিক সংঘাতৰ বাবে অতি নিৰ্মম ভাৱে দাৰে ঘপিয়াই দেওবাৰে পুৱাই গুৰুতৰভাৱে আহত কৰিছিল ছাইদুৰ হকক । পৰৱৰ্তী সময়ত ঘটনাৰ খবৰ পাই ঘটনাস্থলীত উপস্থিত হোৱা দলগাঁও আৰক্ষীয়ে ততাতৈয়াকৈ সংকটজনক অৱস্থাত ছাইদুৰ হকক উদ্ধাৰ কৰি মঙলদৈ অসামৰিক চিকিৎসালয়লৈ প্ৰেৰণ কৰিছিল । কিন্তু উন্নত চিকিৎসাৰ বাবে ছাইদুৰক GMCH লৈ প্ৰেৰণ কৰা হয় যদিও চিকিৎসাধীন অৱস্থাতে দেওবাৰে সন্ধিয়া মৃত্যু হয় লোকজনৰ ।
মৃত ছাইদুৰ হক গাঁওৰক্ষী বাহিনীৰ সম্পাদক বুলিও জানিব পৰা গৈছে । ইফালে হত্যাকাণ্ড সংঘটিত কৰিয়ে পলায়ন কৰা ভতিজা জয়নাল আব্দিনক দলগাওঁ আৰক্ষীয়ে এক গোপন সূত্ৰৰ ভিত্তিত ওৰাং ৰাষ্ট্ৰীয় উদ্যানৰ দাঁতিকাষৰীয়া অঞ্চলৰ পৰা গ্ৰেপ্তাৰ কৰে ।
লগতে পঢ়ক : অসমৰ চিকিৎসকৰ পৰা নৃত্য শিকিবলৈ আগ্ৰহ প্ৰকাশ হৃত্বিক ৰোছনৰ
