উত্তৰ অভয়াপুৰী, 18 ডিচেম্বৰ : বঙাইগাঁও জিলাৰ অভয়াপুৰী আৰক্ষী থানাৰ অন্তৰ্গত বৰঘোলা আৰক্ষী চকীৰ কীৰ্ত্তনপাৰাত এখন নাম্বাৰ বিহীন বলেৰ' পিক আপ ভান উদ্ধাৰ হৈছে । জানিব পৰা মতে,সাজাল পাৰাৰ আয়নাল হকৰ ঘৰৰ পৰা নাম্বাৰ প্লেট বিহীন গাড়ীখন বৰঘোলা আৰক্ষীয়ে উদ্ধাৰ কৰি কীৰ্তনপাৰা গাঁও পঞ্চায়তৰ কাৰ্যালয়ৰ চৌহদত ৰাখিছে ৷
গাড়ীখন চুৰি কৰি অনা বুলি স্থানীয় ৰাইজে সন্দেহ প্ৰকাশ কৰিছে । ইফালে,গাড়ীখন চুৰি কৰি চক্ৰটোৱে গাড়ীখনৰ পাৰ্টছ বিক্ৰী কৰাৰ যো-জা কৰিছে। উল্লেখ্য যে,কীৰ্ত্তনপাৰা গাঁৱত ইয়াৰ পূৰ্বেও কেইবাখনো চুৰি গাড়ী উদ্ধাৰ কৰা হৈছে ।
ইফালে,গাড়ী চুৰি চক্ৰৰ লগত বৰঘোলা আৰক্ষীৰ গোপন বুজাবুজিৰ অভিযোগ উত্থাপন হৈছে । গাড়ী চুৰিৰ ঘটনা সন্দৰ্ভত বৰঘোলা আৰক্ষীয়ে গোচৰ ৰুজু কৰা বুলি জানিব পৰা গৈছে যদিও আৰক্ষীৰ ভূমিকা ৰহস্যজনক । যাৰ বাবে স্থানীয় ৰাইজে গাড়ী চুৰি চক্ৰটোৰ বিৰুদ্ধে শীঘ্ৰে তদন্ত আৰম্ভ কৰাৰ দাবী জনাইছে ৷
লগতে পঢ়ক : উত্তৰ কামৰূপত বন বিষয়াক মেনেজ কৰি চোৰাং ব্যৱসায়ীৰ বন ধংস !
