ধুবুৰীত আটক ইৰাণী গোটৰ সদস্য

ধুবুৰীত কপ ৰাইডাৰ্চ নামৰ বিশেষ অভিযানকাৰী দলে অভিযান চলাই আটক কৰে এজন ইৰাণী গোটৰ সদস্যক, উদ্ধাৰ এখন ভুৱা নম্বৰপ্লেট লগোৱা বাইক

ধুবুৰী, 9 এপ্ৰিলঃ ধুবুৰী আৰক্ষীৰ "কপ ৰাইডাৰ্চ" নামৰ বিশেষ অভিযানকাৰী দলৰ সফলতা ৷ দলটোৱে ধুবুৰী জিলাত অভিযান চলাই জালত পেলাই দুৰ্ধৰ্ষ ইৰাণী গোটৰ এজন সদস্যক ৷ সদস্যজন বিহাৰৰ কাটিহাৰ জিলাৰ কোলহা আৰক্ষী থানাৰ অন্তৰ্গত অবিনাশ কুমাৰ যাদৱ ৷ ধুবুৰী চহৰৰ এটা এছ বি আই বেংকৰ মূল শাখাৰ এগৰাকী গ্ৰাহকৰ পৰা ধন লুট কৰিবলৈ লওঁতেই অভিযানকাৰী দলটোৱে হাতে-লোটে আটক কৰে সদস্যজনক ৷ আৰক্ষীয়ে যুৱকজনৰ পৰা ভুৱা নম্বৰ প্লেট থকা এখন মটৰ চাইকেল আৰু কিছু পাউডাৰ জাতীয় সামগ্ৰী উদ্ধাৰ কৰে ৷

উল্লেখযোগ্য যে কিছু দিন পূৰ্বে ইৰাণী গোটৰ সদস্যই ধুবুৰী জিলাৰ গৌৰীপুৰ আৰু বিলাসীপাৰাৰ বহুলোকৰ পৰা ধন লুটি কৰিছিল ৷ ঘটনা সন্দৰ্ভত আৰক্ষীয়ে তদন্ত অব্যাহত ৰাখিছিল যদিও কোনো তথ্য ফাদিল কৰা নাছিল, ধুবুৰী আৰক্ষীয়ে "কপ ৰাইডাৰ্চ" নামৰ এটা বিশেষ অভিযানকাৰী দল গঠন কৰে ৷ দলটোৰ অভিযানত সোমবাৰে হাতে-লোটে ধৰা পেলাই আটক কৰে ধৃত অবিনাশ নামৰ সদস্যজনক ৷ ইতিমধ্যেই ঘটনা সন্দৰ্ভত আৰক্ষীয়ে আটক কৰা ইৰাণী গোটৰ সদস্যজনক জেৰা অব্যাহত ৰাখিছে ৷