ইণ্টাৰনেশ্যনেল ডেস্ক, ২৯ ডিচেম্বৰ: বিশ্বৰ প্ৰায় ১০০ খন দেশত দ্ৰুত গতিত বৃদ্ধি পাইছে ক'ভিড-১৯ৰ ভেৰিয়েণ্ট অ'মিক্ৰণৰ সংক্ৰমণ । দৈনিক আক্ৰান্তৰ বৰ্দ্ধিত সংখ্যাই চিন্তিত কৰি তুলিছে সকলোকে । ক'ভিড সম্পৰ্কীয় সাৱধনতা অৱলম্বন কৰিবলৈ সকলোকে বাৰে বাৰে সকীয়াই দিছে বিশ্ব স্বাস্থ্য সংস্থাই(WHO on Covid variant Omicron infection) । শেহতীয়াকৈ বিশ্ব স্বাস্থ্য সংস্থাৰ সঞ্চালক প্ৰধান টেড্ৰোছ অধানম ঘেব্ৰেয়েছাছে বুধবাৰে পুনৰ সকীয়নি দিছে য়ে, অ'মিক্ৰণৰ সংক্ৰমণৰ বিপদাশংকা বৰ্তমান অতি বেছি হৈ আছে(Tedros Adhanom warns of high risk of Omicroin) ।
আনহাতে, বিশ্ব স্বাস্থ্য সংস্থাৰ মহামাৰী বিজ্ঞানৰ সাপ্তাহিক আপডেটত প্ৰকাশ পাইছে যে, ২০-২৬ ডিচেম্বৰ পৰ্যন্ত বিশ্বজুৰি নতুনকৈ আক্ৰান্ত হোৱা ক'ভিড ৰোগীৰ সংখ্যা আগৰ সপ্তাহৰ তুলনাত ১১ শতাংশ বৃদ্ধি পাইছে । ধাৰাবাহিকভাৱে প্ৰকাশিত তথ্যসমূহে প্ৰমাণ কৰিছে যে, ডেল্টা ভেৰিয়েণ্টতকৈ অ'মিক্ৰণৰ সংক্ৰমণ ২-৩ দিনৰ ভিতৰত দুগুণ বৃ্দ্ধি হোৱাৰ সম্ভাৱনা আছে । বিশ্ব স্বাস্থ্য সংস্থাই আমেৰিকা আৰু ইউৰোপৰ দেশবোৰৰ উদাহৰণ দাঙি ধৰি উল্লেখ কৰে যে, সংক্ৰমণ উদ্বেগজনকভাৱে বৃদ্ধি পাইছে । অৱশ্যে, দক্ষিণ আফ্ৰিকাত এতিয়া অ'মিক্ৰণৰ সংক্ৰমণ হ্ৰাস হোৱা পৰিলক্ষিত হৈছে বুলি বিশ্ব স্বাস্থ্য সংস্থাই উল্লেখ কৰিছে ।
বিশ্ব স্বাস্থ্য সংস্থাই উল্লেখ কৰা মতে, সংক্ৰমণ বৃ্দ্ধিৰ লগতে অ'মিক্ৰণে ৰোগ প্ৰতিৰোধী প্ৰতিষেধকৰ প্ৰভাৱ নোহোৱা কৰি প্ৰতিষেধক গ্ৰহণ কৰা লোকক সংক্ৰমিত কৰিব পাৰে ।
ইউৰোপ, দক্ষিণ আফ্ৰিকা আৰু ডেনমাৰ্কৰ প্ৰাৰম্ভিক তথ্যৰ পৰা ধাৰণা কৰিব পৰা গৈছে যে, ডেল্টা ভেৰিয়েণ্টৰ তুলনাত অ'মিক্ৰণত আক্ৰান্তৰ চিকিৎসালয়ত ভৰ্তি হোৱাৰ আশংকা হ্ৰাস পাইছে । উল্লেখ্য যে, যোৱা মাহত দক্ষিণ আফ্ৰিকাত প্ৰথমগৰাকী অ'মিক্ৰণৰ আক্ৰান্ত ৰোগী চিনাক্ত কৰা হৈছিল । দক্ষিণ আফ্ৰিকাৰ স্বাস্থ্য কৰ্তৃপক্ষৰ লগতে আন দেশৰ স্বাস্থ্য বিশেষজ্ঞসকলেও সতৰ্ক কৰি দিছে যে, অ'মিক্ৰণ ভেৰিয়েণ্ট অধিক সংক্ৰামক । লগতে বিশেষজ্ঞসকলে কয় যে, এই ভেৰিয়েণ্টৰ দ্বাৰা আক্ৰান্ত হোৱা ৰোগীৰ দেহত মহামাৰীৰ মৃদু লক্ষণহে দেখা পোৱা যায় ।
লগতে পঢ়ক:মুম্বাইত দ্ৰুত গতিত বৃদ্ধি হৈছে COVID-19 ত আক্ৰান্তৰ সংখ্যা ; নতুনকৈ ১,৩৭৭ জন আক্ৰান্ত
