নিউজ ডেস্ক, 23 এপ্ৰিলঃ প্ৰতিদিনেই বৃদ্ধি পাই আছে কৰ'ণা ভাইৰাছ মহামাৰীত আক্ৰান্ত হোৱা লোকৰ সংখ্যা । এই মহামাৰীয়ে এতিয়ালৈ আক্ৰান্ত কৰিছে 26,37,888 গৰাকী লোকক । মৃত্যুমুখত পেলাইছে 1,84,235 গৰাকীক ৷ আনহাতে,এই পৰ্যন্ত 7,17,819 গৰাকী লোক সুস্থ হৈ উঠিছে ৷
বিশ্ব স্বাস্থ্য সংস্থাৰ মুৰব্বী টেণ্ড্ৰছ আধানম ঘেব্ৰায়েচাচে বুধবাৰে কয় যে, COVID-19 সংকট শীঘ্ৰেই অন্ত নপৰে,বহুকেইখন দেশত এতিয়াও প্ৰাৰম্ভিক পৰ্যায়তে ভাইৰাছৰ বিৰুদ্ধে যুঁজ চলি আছে ।
চীনত নতুনকৈ 10 জন লোকৰ মৃত্যুৰ বাতৰি আহিছে । এই দহজনৰ ভিতৰত 6 জন লোকেই আন দেশৰ নাগৰিক আছিল । কৰ'ণা ভাইৰাছৰ জন্মস্থান চীনৰ য়ুহান চহৰত বৰ্তমান মাত্ৰ 69জন লোক চিকিৎসাধীন হৈ আছে,ইয়াৰে দুজনৰ অৱস্থা সংকটজনক ।
কৰ'ণা ভাইৰাছৰ ফলত অধিকাংশ দেশেই লক ডাউন কৰাবলৈ বাধ্য হৈছে আৰু ইয়াৰ ফলত সকলো দেশেই বৃহৎ অৰ্থনৈতিক সংকটৰ সন্মুখীন হৈছে । আমেৰিকা,বৃটেইন,জাৰ্মানী আদিৰ দৰে শক্তিশালী দেশ সমূহো COVID-19ৰ দ্বাৰা বেয়াকৈ ক্ষতিগ্ৰস্ত হৈছে ।
