চিটাৰা ডেস্ক, 20 অক্টোবৰ: একচন ছবিৰ বাবে পৰিচিত টাইগাৰ শ্ৰফ । অভিনেতাগৰাকীয়ে নিজৰ একচন মুডৰ দ্বাৰা বলীউডত নিজৰ বাবে এক সুকীয়া পৰিচয় গঢ়ি তুলিছে ৷ তেওঁৰ প্ৰায়ভাগ ছবিত শক্তিশালী ষ্টাণ্ট আৰু একচন ছিকুৱেন্স কৰা দেখা যায় । আজি তেওঁৰ একচন ছবি ‘গণপত: এ হিৰো ইজ বৰ্ণ’ ৰূপালী পৰ্দাত মুক্তি লাভ কৰিলে । এই বিশেষ ক্ষণত টাইগাৰ শ্ৰফে তেওঁৰ ছবিৰ বাবে বাপ্পাৰ আশীৰ্বাদ বিচাৰি মুম্বাইৰ সিদ্ধিবিনায়ক মন্দিৰত উপস্থিত হয় ।
টাইগাৰ শ্ৰফৰ নতুন ছবি ‘গণপথ’ আজি অৰ্থাৎ ২০ অক্টোবৰত ছবিগৃহত মুক্তি লাভ কৰিছে । এই বিশেষ উপলক্ষে টাইগাৰে বাপ্পাৰ আশীৰ্বাদ বিচাৰি গৈছিল সিদ্ধিবিনায়ক মন্দিৰত । মন্দিৰৰ পৰা সম্প্ৰতি ভাইৰেল হৈ পৰিছে গণপত অভিনেতাজনৰ এখন ছবি, য’ত টাইগাৰে বগা ৰঙৰ ফুলৰ ছপা চাৰ্ট, কপালত তিলক আৰু ডিঙিত গণপতিৰ চাদৰ পৰিধান কৰা পৰিলক্ষিত হৈছে ৷ ছবিখনত মন্দিৰ সমিতিয়ে সিদ্ধিবিনায়কৰ ফটো টাইগাৰক উপহাৰ দিয়া দেখা গৈছে । মন্দিৰৰ পৰা ওলাই আহি টাইগাৰ শ্ৰফে নিজৰ অনুৰাগীক নমস্কাৰ জনায় ৷
গণপত: এ হিৰো ইজ বৰ্ণ ছবিখনৰ বিষয়ে
উল্লেখ্য যে ‘গণপত’ ছবিখন লিখিছে বিকাশ বাহলে ৷ ছবিখন পৰিচালনা কৰিছে খোদ বিকাশ বাহলেই । এই ছবিখনত টাইগাৰৰ সৈতে অভিনয় কৰিছে অভিনেত্ৰী কৃতি সেননে । টাইগাৰ-কৃতিৰ উপৰিও অমিতাভ বচ্চন আৰু এলি অভ্ৰামৰ দৰে আন তাৰকাকো দেখা গৈছে এই ছবিখনত । আজি দশেৰা উপলক্ষে ছবিগৃহত মুক্তি লাভ কৰিছে ছবিখন । হিন্দী, তামিল, তেলুগু, কানাড়া আৰু মালয়ালম ভাষাত মুক্তি লাভ কৰিছে ‘গণপত’।
লগতে পঢ়ক: Shah Rukh, Alia and Ranbir: অৱশেষত জৱানে পালে আলিয়াক ! শ্বাহৰুখ-আলিয়া-ৰণবীৰৰ নতুন ভিডিঅ’টি চালেনে ?
