চিটাৰা ডেস্ক, 7 নৱেম্বৰ: 6 নৱেম্বৰত ৰণবীৰ কাপুৰ আৰু আলিয়া ভাটে উদযাপন কৰে তেওঁলোকৰ মৰমৰ কন্যা ৰাহাৰ প্ৰথমটো জন্মদিন । এই বিশেষ দিনটোত আলিয়া আৰু ৰণবীৰে আয়োজন কৰে এক বৃহৎ জন্মদিনৰ পাৰ্টিৰ ৷ য’ত অংশগ্ৰহণ কৰে বলীউডৰ বহু চেলিব্ৰিটিয়ে । মুম্বাইৰ দ্য প্ৰাইভেট চেফছ ক্লাবৰ মুখ্য চেফ হৰ্ষ দীক্ষিতে শেহতীয়াকৈ ৰণবীৰ আৰু আলিয়াৰ সৈতে চেফ দলৰ এখন ফটো শ্বেয়াৰ কৰিছে । এই বিশেষ দিনটোৰ বাবে প্ৰস্তুত কৰা হৈছিল সুস্বাদু খাদ্য, যিটোৰ আভাস তেওঁ শ্বেয়াৰ কৰিছে।
আলিয়া ভাট আৰু ৰণবীৰ কাপুৰে চেফ দলৰ সৈতে গ্ৰুপ ফটো শ্বেয়াৰ কৰে
আলিয়া ভাট আৰু ৰণবীৰ কাপুৰে কন্যা ৰাহা কাপুৰৰ প্ৰথম জন্মদিন উদযাপনৰ বাবে এক গ্ৰেণ্ড পাৰ্টিৰ আয়োজন কৰে । এই পাৰ্টিৰ মেনুত ৰখা হৈছিল সুস্বাদু খাদ্য ৷ প্ৰাইভেট চেফছ ক্লাবে এই খাদ্য পৰিচালনা কৰিছিল, মুখ্য চেফ হৰ্ষ দীক্ষিতে পিতৃ-মাতৃ ৰণবীৰ আৰু আলিয়াৰ সৈতে চেফ দলৰ এখন ফটো শ্বেয়াৰ কৰিছে ৷ লগতে তেওঁলোকে সুস্বাদু খাদ্যৰ মেনু প্ৰকাশ কৰে য’ত আছিল ফ্ৰাই, ৰিবন চেণ্ডুইচ, ব্ৰী চিলি চীজ টোষ্ট, টেকো, ড’ছা আৰু অন্যান্য সুস্বাদু বস্তু ।
ৰাহাৰ প্ৰথম জন্মদিনৰ অনুষ্ঠানৰ কিছু আভাস শ্বেয়াৰ কৰিছে মাহীয়েক শ্বাহীন ভাটে
আজি আলিয়া ভাটৰ ভগ্নী শ্বাহীন ভাটে তেওঁৰ ইনষ্টাগ্ৰামত ৰাহাৰ জন্মদিন উদযাপনৰ কিছু আভাস শ্বেয়াৰ কৰিছে । ৰণবীৰ আৰু আলিয়াৰ ঘৰত জন্মদিন উদযাপনৰ ভিতৰৰ এক আভাস শ্বেয়াৰ কৰে শ্বাহীন ভাটে। ফটোখনত এটা সুন্দৰকৈ সজাই তোলা ঘৰৰ কোণ দেখা গৈছে, য’ত এল ই ডি লাইটৰ দ্বাৰা নিৰ্মিত কৰা হৈছিল ‘১’ নম্বৰ, লগতে পটভূমিত দেখা গৈছিল বেলুন ।
ৰাহাৰ প্ৰথম জন্মদিনত আলিয়া ভাটৰ পোষ্ট
কন্যা ৰাহা কাপুৰৰ বাবে আলিয়া ভাটে শ্বেয়াৰ কৰিছে এক আন্তৰিক বাৰ্তা । যদিও ছবিবোৰত ৰাহাৰ মুখখন দেখুওৱা নাছিল, তথাপিও প্ৰথম ছবিখনত ৰাহাৰ হাত দুখনে সুস্বাদু কেক ধৰি থকা পৰিলক্ষিত হৈছে । দ্বিতীয়খন ছবিত আলিয়া, ৰণবীৰ আৰু ৰাহাই ফুল ধৰি আছে আৰু তৃতীয়খন ছবিত আলিয়া-ৰণবীৰে জুকবক্স ধৰি এডিথ পিয়াফৰ জনপ্ৰিয় গীত লা ভি এন ৰোজ (লাইফ ইন পিংক) বজাই থকা দেখা গৈছে ।
