চিটাৰা ডেস্ক, ২৪ ডিচেম্বৰ: পদ্মশ্ৰী সন্মান লাভ শাস্ত্ৰীয় গায়ক ৰাশ্বিদ খানক লৈ পোহৰলৈ আহিছে এক চিন্তনীয় খবৰ । প্ৰতিবেদন অনুসৰি ৰাশ্বিদ খান কলকাতাৰ এখন চিকিৎসালয়ত ভৰ্তি হৈ আছে । ৫৫ বছৰীয়া কণ্ঠশিল্পীগৰাকী প্ৰষ্টেট কেন্সাৰ ৰোগত আক্ৰান্ত হোৱাৰ তথ্য পোৱা গৈছে । জানিব পৰা মতে তেওঁৰ অৱস্থা সংকটজনক । বৰ্তমান তেওঁ ভেন্টিলেশ্যনত আছে । বিগত এমাহ ধৰি পিয়েৰলেছ হাস্পতালত প্ৰষ্টেট কেন্সাৰ ৰোগত আক্ৰান্ত হৈ চিকিৎসাধীন হৈ আছে ৰাশ্বিদ খান । কেৱল ইমানেই নহয়, তেওঁ উচ্চ ৰক্তচাপৰ সমস্যাতো ভুগি আছে ।
প্ৰষ্টেট কেন্সাৰ ৰোগত আক্ৰান্ত হৈ কলকাতাৰ এখন চিকিৎসালয়ত চিকিৎসাধীন হৈ থকা ৰাশ্বিদ খানৰ স্বাস্থ্যৰ অৱস্থা দেওবাৰেও অধিক সংকটজনক হৈ পৰে ৷ এই কথা জানিবলৈ দিয়ে হাস্পতালৰ এগৰাগী চিকিৎসকে । চিকিৎসকগৰাকীয়ে কয় যে শাস্ত্ৰীয় গায়কগৰাকী এতিয়াও ভেণ্টিলেচনত আছে ।
খানৰ চিকিৎসাধীন হৈ থকা চিকিৎসালয়খনৰ চিকিৎসকগৰাকীয়ে পিটিআইক জনাই যে , ‘‘তেওঁৰ অৱস্থা সংকটজনক হৈয়ে আছে । আমাৰ চিকিৎসকসকলে তেওঁৰ ওপৰত চকু ৰাখিছে । শুকুৰবাৰে মস্তিষ্কৰ আক্ৰমণৰ পিচত সংগীতজ্ঞজনৰ স্বাস্থ্যৰ অৱনতি ঘটে ।’’
উল্লেখ্য যে, ৰাশ্বিদ খানৰ দৈনন্দিন কাম-কাজ পুৱা চাৰি বজাৰ পৰা আৰম্ভ হয় । মাত্ৰ ১১ বছৰ বয়সতে তেওঁৰ যাত্ৰা আৰম্ভ হৈছিল । ৰামপুৰ-সহচৱান পৰিয়ালৰ অন্তৰ্গত তেওঁ মেহবুব খান আৰু তেওঁৰ পুত্ৰ ইনায়ত হুছেইন খানৰ প্ৰপৌত্ৰ ।
ৰাশ্বিদ খানৰ কাম
কণ্ঠশিল্পীগৰাকীয়ে বহু বাংলা গীততো নিজৰ কণ্ঠ নিগৰাইছে আৰু বলীউডৰ জনপ্ৰিয় গীত 'তোৰে বিনা মহে চেইন নাহি' আৰু 'আওগে জব তুম'ৰ দৰে জনপ্ৰিয় গীতত কণ্ঠ নিগৰাইছে । কেৱল ইমানেই নহয় ‘মাই নেম ইজ খান’, ‘ৰাজ ৩’, ‘বাপি বাৰী জা’, ‘কদম্বৰী’, ‘ছাদি মে জৰুৰ আনা’, ‘মন্তো’ আৰু ‘মীতিন মাছ’ আদি হিন্দী ছবিৰ বাবেও গীত গাইছে কণ্ঠশিল্পীগৰাকীয়ে ।
২০০৬ চনত তেখেতক পদ্মশ্ৰী বঁটাৰে সন্মানিত কৰা হয় । আনহাতে ২০১২ চনত বংগভূষণ আৰু ২০২২ চনত পদ্মভূষণ সন্মানেৰে সন্মানিত কৰা হয় ।
লগতে পঢ়ক: কেন্সাৰৰ সৈতে যুঁজি অৱশেষত ইহলীলা সম্বৰণ অভিনেতা জুনিয়ৰ মেহমুদৰ
