চিটাৰা ডেস্ক, 3 নৱেম্বৰ: বলীউডৰ অভিনেত্ৰী কংগনা ৰনৌতে উৎকৃষ্ট অভিনয়ৰে চলচ্চিত্ৰ জগতত নিজৰ এক অনন্য নাম বনাবলৈ সক্ষম হৈছে । তেওঁৰ অভিনয় প্ৰতিভা তেওঁৰ যিকোনো ছবিতে স্পষ্টকৈ দেখা যায় । এতিয়া শেহতীয়াকৈ কংগনাৰ ছবি ‘তেজস’ ছবিগৃহত মুক্তি লাভ কৰিছে, কিন্তু ছবিখনে ছবিগৃহত দৰ্শকক আকৰ্ষিত কৰাত ব্যৰ্থ হৈছে ৷ যাৰ বাবে বক্স অফিচত ফ্লপ ৰূপে পৰিগণিত হৈছে তেজস ৷ ইয়াৰ মাজতে এতিয়া কংগনাৰ সন্দৰ্ভত এটা ডাঙৰ খবৰ আহিছে । দৰাচলতে ৰাজনীতিত প্ৰৱেশৰ সন্দৰ্ভত কংগনাই এটা ডাঙৰ মন্তব্য কৰিছে, আগন্তুক লোকসভা নিৰ্বাচনত অভিনেত্ৰীগৰাকীয়ে প্ৰতিদ্বন্দ্বিতা কৰিব বুলি ইংগিত দিছে ।
বলীউডৰ পৰা ৰাজনীতিলৈ ঢাপলি মেলিব কংগনা !
‘তেজস’ ছবিখন ফ্লপ হোৱাৰ পিচতে শ্ৰীকৃষ্ণৰ দৰ্শন কৰিবলৈ দ্বাৰকাধীশ মন্দিৰলৈ গৈছে কংগনা । দ্বাৰকাধীশ মন্দিৰৰ পৰা অভিনেত্ৰীগৰাকীয়ে বহু ফটো আৰু ভিডিঅ’ শ্বেয়াৰ কৰিছে ৷ কিন্তু এই ফটোসমূহ শ্বেয়াৰ কৰাৰ বাবেও ছ’চিয়েল মিডিয়াত কংগনাক ট্ৰ’ল কৰিছে একাংশই ৷ এই ফটোসমূহ শ্বেয়াৰ কৰাৰ পিচতে কংগনাই আগন্তুক লোকসভা নিৰ্বাচনত প্ৰতিদ্বন্দ্বিতা কৰিব পাৰে বুলি বহু ইউজাৰে জল্পনা-কল্পনা কৰি আছিল ।
নিৰ্বাচনী প্ৰতিদ্বন্দ্বিতা সন্দৰ্ভত এই ডাঙৰ বক্তব্য কংগনাৰ
শেহতীয়াকৈ অভিনেত্ৰীগৰাকীয়ে নাগেশ্বৰ মহাদেৱ মন্দিৰ পৰিদৰ্শন কৰি ভগৱানৰ আশীৰ্বাদ লয় । ইয়াৰ পিচত সংবাদ মাধ্যমৰ সৈতে কথা পাতি অভিনেত্ৰীগৰাকীয়ে লোকসভা নিৰ্বাচনত প্ৰতিদ্বন্দ্বিতা কৰাৰ ইংগিত দিয়ে । কংগনাই কয়, ‘‘ভগৱান শ্ৰী কৃষ্ণ যদি সন্তুষ্ট হয়, তেন্তে মই লোকসভা নিৰ্বাচনত প্ৰতিদ্বন্দ্বিতা কৰিম ।’ কংগনাৰ এই বক্তব্যৰ পিচতে ছ’চিয়েল মিডিয়া প্ৰতিক্ৰিয়াৰ সৃষ্টি হৈছে ৷ এতিয়া প্ৰশ্ন হয় সঁচাকৈ নিৰ্বাচনত প্ৰতিদ্বন্দ্বিতা কৰিব নে কংগনাই ৷ অৱশ্যে কংগনাই বিজেপিৰ হৈ নিৰ্বাচনত প্ৰতিদ্বন্দ্বিতা কৰিব নে নকৰে সেয়া গম পোৱা যাব আগন্তুক নিৰ্বাচনৰ তালিকা ঘোষণাৰ পাছতহে ৷
