চিটাৰা ডেস্ক, 20 জুন: প্ৰভাস, কৃতি সেনন আৰু ছৈফ আলী খানৰ অভিনীত ছবি ‘আদিপুৰুষ’ মুক্তিৰ পিছৰে পৰা সোমাই পৰিছে বিতৰ্কৰ আৱৰ্তত ৷ ছবিখনৰ সংলাপৰ বাবে ছবিখনৰ লেখক মনোজ মুন্টাশ্বিৰক দেশজুৰি সমালোচনা কৰা হৈছে ৷ এতিয়া এই সকলোবোৰৰ মাজতে মনোজে আন এক বিস্ফোৰক মন্তব্য কৰিছে ৷ যাৰ বাবে ছ’চিয়েল মিডিয়াত সৃষ্টি হৈছে তীব্ৰ বিতৰ্কৰ ৷ লেখকগৰাকীয়ে এনেকুৱা এটা মন্তব্য কৰিছে যিয়ে ৰাইজৰ আৱেগক আঘাত কৰিছে। দৰাচলতে মনোজে কৈছে যে হনুমান জী ভগৱান নহয় । মনোজৰ এই বক্তব্যৰ পিচতে ছ’চিয়েল মিডিয়া ব্যৱহাৰকাৰীয়ে তেওঁক লক্ষ্য কৰি লয় ৷
শেহতীয়াকৈ সংবাদ মাধ্যমত দিয়া এক সাক্ষাৎকাৰত মনোজে কৈছিল যে বজৰং বালি ভগৱান নহয়, তেওঁ এজন ভক্ত, আমি মানুহে তেওঁক পিচত ঈশ্বৰ বনালোঁ । মনোজৰ এই সাক্ষাৎকাৰটো অতি কম সময়তে ভাইৰেল হৈ পৰে ছ’চিয়েল মিডিয়াত ৷ ছ’চিয়েল মিডিয়াত ভাইৰেল হোৱাৰ পিচতে যথেষ্ট সমালোচনাৰ সন্মুখীন হৈছে মনোজ মুন্টাশ্বিৰ । ছ’চিয়েল মিডিয়াত সকলোৱে তেওঁক মনে মনে থাকিবলৈ পৰামৰ্শ দিয়ে ।
ইফালে সোমবাৰে হ্ৰাস পালে ছবিখনৰ উপাৰ্জন
উল্লেখ্য যে, সোমবাৰে ছবিখনৰ উপাৰ্জন সংগ্ৰহত ব্যাপক অৱনতি ঘটিছে। সোমবাৰে ছবিখনৰ উপাৰ্জন ৭০ শতাংশ হ্ৰাস পাইছে। খবৰ অনুসৰি ছবিখনৰ হিন্দী সংস্কৰণে সোমবাৰে মাত্ৰ ৯ কোটি টকাহে উপাৰ্জন কৰিছে। মুক্তিৰ প্ৰথম সপ্তাহৰ শেষৰ ফালে ছবিখনে ভাল উপাৰ্জন কৰিছিল ৷ যদিও ছবিখনক লৈ বিতৰ্ক বৃদ্ধি পোৱাৰ লগে লগেই ছবিগৃহত হ্ৰাস পাইছে দৰ্শকৰ সংখ্যাও ৷
খবৰ অনুসৰি 500 কোটি টকাৰ বিশাল বাজেটত নিৰ্মাণ কৰা হৈছে ছবিখন । প্ৰভাস, কৃতি আৰু ছৈফৰ উপৰিও ছবিখনত অভিনয় কৰিছে ছানী সিং, সোনাল চৌহান, সিদ্ধাৰ্থ নিগমে ।
লগতে পঢ়ক: Salman Khan: কি হ’ল ভাইজানৰ ? ছলমান খানৰ ফুলি থকা চকু দেখি চিন্তিত হৈ পৰিল অনুৰাগী
