ধুবুৰী, 11 জুলাই : ৰাজ্যত অব্যাহত আছে ড্ৰাগছ (Drugs) চুলাই মদৰ লগতে বিভিন্ন নিচাজাতীয় সামগ্ৰীৰ বিৰুদ্ধে আৰক্ষীৰ অভিযান ৷ শনিবাৰে নিশা গৌৰীপুৰ আৰক্ষী (Gauripur Police) আৰু গৌৰীপুৰৰ ৪৮ চি আৰ পি এফৰ যৌথ অভিযানত প্ৰায় দহ লাখ টকা মূল্যৰ ড্ৰাগছ আৰু ২ লাখ ২০হাজাৰ টকা জব্দ কৰিবলৈ সক্ষম হয় । ঝগৰাৰপাৰ চতুৰ্থ খণ্ড গাঁৱৰ ৰফিকুল ইছলাম নামৰ যুৱক জনৰ ঘৰত আৰক্ষীয়ে চলাইছিল এই অভিযান । আৰক্ষীৰ অভিযানত বুজন পৰিমাণৰ ড্ৰাগছসহ ড্ৰাগছ মাফিয়া ৰফিকুলক আটক কৰে আৰক্ষীয়ে ।
ধৃত ৰফিকুল ইছলামৰ ঘৰৰ পৰা আৰক্ষীয়ে জব্দ কৰা সামগ্ৰীখিনিৰ ভিতৰত ৫০ পেকেট ইয়াবা টেবলেট, ২০০ টা ব্ৰাউন ছুগাৰ টেবলেট ভৰ্তি কন্টেইনাৰ, ২ টা কফ ছিৰাফ (Cough Syrup) বটল জব্দ কৰে । ড্ৰাগছ মাফিয়া ৰফিকুলে দীৰ্ঘদিন ধৰি ধুবুৰীৰ বিভিন্ন অঞ্চলত ড্ৰাগছৰ ৰমৰমীয়া বেহা চলাই আছিল বুলি অভিযোগ লাভ কৰিছিল আৰক্ষীয়ে । ইতিমধ্যে গৌৰীপুৰ আৰক্ষী আৰু চি আৰ পি এফে ড্ৰাগছ আৰু নগদ ধন সহ ড্ৰাগছ মাফিয়া যুৱকজনক গতাই দিয়ে ধুবুৰী আৰক্ষীক ।
ইয়াৰ সমান্তৰালকৈ শনিবাৰে নিশা হোজাই জিলাৰ উদালী তিনিআলি বজাৰৰ এখন ফাৰ্মাচীৰ পৰা 300 নিচাজাতীয় কফ চিৰাপ (Cough Syrup)ৰ বটল জব্দ কৰে আৰক্ষীয়ে ৷ হোজাই জিলাৰ লংকা আৰক্ষী থানা (Lanka Police Station)ৰ অন্তৰ্গত উদালী তিনিআলি উপ-আৰক্ষী চকীৰ ভাৰপ্ৰাপ্ত আৰক্ষী বিষয়া টুলেন চন্দ্ৰ দাসৰ নেতৃত্বত এক গোপন সুত্ৰৰ ভিত্তিত অভিযান চলাই জব্দ কৰা হয় বটলকেইটা ৷
ঘটনা সন্দৰ্ভত এজনক আটক কৰি সোধ-পোছ অব্যাহত ৰাখিছে আৰক্ষীয়ে ৷ তদন্তৰ অন্তত এই নিচাজাতীয় কফ চিৰাপৰ সৈতে জড়িত থকা কেইবাজনো লোকক আটক কৰাৰ সম্ভাৱনা থকা বুলি জানিবলৈ দিয়ে ভাৰপ্ৰাপ্ত আৰক্ষী বিষয়া গৰাকীয়ে । একেদৰে দেওবাৰেও গোলাঘাট জিলাৰ বৰপথাৰৰ সৰুপাভজান মিচিং গাঁৱত আৰক্ষীয়ে অভিযান চলাই তিনিটা বৃহৎ বৃহৎ অবৈধ চুলাই মদৰ ঘাটি উচ্চেদ কৰিবলৈ সক্ষম হয় । অভিযানত প্ৰায় ১৭০০০ লিটাৰ চুলাই বনোৱা কেঁচা সামগ্ৰী নষ্ট কৰা হৈছে বুলি জানিব পৰা গৈছে ।
লগতে পঢ়ক-মঙলদৈ আৰক্ষীৰ তৎপৰতাত জব্দ 1500 লিটাৰৰো অধিক চুলাই
