ডিফু,৭ জুন: ড্ৰাগছৰ বিৰুদ্ধে আৰক্ষীয়ে একাধিক সফল অভিযান চলোৱাৰ পাচতো যেন অধিক তৎপৰ হৈ পৰিছে ড্ৰাগছ সৰবৰাহকাৰী ৷ কাৰ্বি আংলং জিলাৰ অসম-নাগালেণ্ড সীমান্তত অবৈধ ড্ৰাগছ, হেৰ'ইন, ব্ৰাউন চুগাৰ আদিৰ সৰবৰাহ এতিয়াও অব্যাহত আছে ৷
কিয়নো বোকাজানত পুনৰ উদ্ধাৰ হৈছে অবৈধ ড্ৰাগছ ৷ আব্দুল কাদিৰ নামৰ এজন লোকৰ ঘৰত ওলাল ২৬ টা চাবোনৰ বাকচত লুকুৱাই ৰখা নিষিদ্ধ ড্ৰাগছ ৷ বোকাজান মহকুমা আৰক্ষীয়ে সদৰী কৰা মতে, এক গোপন সূত্ৰৰ পম খেদি এক অভিযান চলোৱা হৈছিল আব্দুল কাদিৰৰ ঘৰত ৷
অভিযানত ৩৩১ গ্ৰাম হেৰ'ইন জব্দ কৰা হয় ৷ হেৰ'ইনখিনি কাদিৰৰ ঘৰৰ পিছফালে মাটিত পুতি থোৱা আছিল বুলি জানিবলৈ দিছে আৰক্ষীয়ে ৷ ঘটনাৰ সৈতে জড়িত থকা আব্দুল কাদিৰক খটখটি আৰক্ষীয়ে ইতিমধ্যে আটক কৰিছে ৷ উদ্ধাৰ হোৱা হেৰ'ইনখিনিৰ আন্তঃৰাষ্ট্ৰীয় বজাৰমূল্য ২ কোটি ৫০ লাখ টকা হ'ব বুলি সন্দেহ কৰিছে আৰক্ষীয়ে ৷
লগতে পঢ়ক : Etv Bharat ৰ বাতৰিৰ প্ৰভাৱ: জকাইত বৃদ্ধ দম্পতীক আগবঢ়ালে সহায়
