তেজপুৰ, 1 নৱেম্বৰ : কাজিৰঙা ৰাষ্ট্ৰীয় উদ্যানত আজিৰে পৰাই আৰম্ভ হৈছে হাতী ছাফাৰী সেৱা ৷ কোভিড-19 মহামাৰীৰ সময়ত সকলোধৰণৰ স্বাস্থ্যগত বিধি মানি এই সেৱা আৰম্ভ কৰা হৈছে ৷ ৰাষ্ট্ৰীয় উদ্যান কৰ্তৃপক্ষই ইটিভি ভাৰতক জনাইছে এই কথা ৷
ৰাষ্ট্ৰীয় উদ্যান কৰ্তৃপক্ষই জনোৱা মতে, দেওবাৰৰ দিনটোত 37 গৰাকী যাত্ৰীক হাতী ছাফাৰীৰে উদ্যানৰ ভিতৰত প্ৰৱেশৰ বাবে অনুমতি দিয়া হয় ৷ ইতিমধ্যে উদ্যান কৰ্তৃপক্ষই হাতী ছাফাৰীৰ বাবে আগতীয়াকৈ পঞ্জীয়ন আৰম্ভ কৰিছিল আৰু ইয়াৰ 100 শতাংশ আসন পূৰ্ণ হৈছে ৷
দেওবাৰে ৰাতিপুৱা হাতী ছাফাৰীৰ বাবে হাতী সমূহক সাজু কৰি লৈ পূজা অৰ্চনা কৰা হয় ৷ বিগত 21 অক্টোবৰত ৰাষ্ট্ৰীয় উদ্যানখন পৰ্য্যটকৰ বাবে মুকলি কৰা হৈছিল ৷
উল্লেখ্য যে, চলিত বৰ্ষৰ ফেব্ৰুৱাৰী মাহত উদ্যানখনলৈ পৰ্য্যটকৰ আগমণ কমি আহিছিল আৰু মাৰ্চলৈ উদ্যানখন সম্পূৰ্ণৰূপে বন্ধ হৈ পৰিছিল ৷ বৰ্তমানলৈ উদ্যানখনলৈ প্ৰায় 1,75,000 গৰাকী পৰ্য্যটকৰ আগমণ ঘটে যদিও বিগত বৰ্ষৰ তুলনাত এই সংখ্যা অতিকে কম ৷
লগতে পঢ়ক : পৰ্যটকক আকৰ্ষিত কৰাৰ উদ্দেশ্যে ন ৰূপত কাজিৰঙা
