তেজপুৰ,২১ অক্টোবৰ : ইতিহাসৰ কেতিয়াবা পুনৰাবৃত্তি হয় বুলি এটা প্ৰবাদ আছে । কিন্তু এই ২০২০ চনৰ এপ্ৰিল মাহত ভাৰত-চীনৰ সেনাৰ মুখামুখি ঘটনাৰ পিছত ২০২১ ত অৰুণাচল প্ৰদেশৰ ভিতৰত চীনা সৈন্যৰ তিনিবাৰ প্ৰৱেশৰ চেষ্টাই যেন পুনৰ সোঁৱৰাই দিছে ইতিহাসক । বৰ্তমান অৰুণাচল প্ৰদেশৰ চীন সীমান্তত ভাৰতীয় সেনাৰ এয়াৰ স্পেছ ৰাডাৰ স্থাপন আৰু বফ’ৰ্চ গানৰ ব্যৱহাৰৰ অনুশীলন চলিছে । প্ৰচণ্ড বৰফৰ মাজত সেনাৰ দুৰ্দান্ত আখৰা টাৱাঙৰ সমীপত ৷ এই তথ্য প্ৰকাশ ইষ্টাৰ্ণ কামণ্ডৰ সেনা প্ৰধান মনোজ পাণ্ডেৰ ।
সুদীৰ্ঘ ৫৯ বছৰ আগতে চীনা সৈন্যই ভাৰতৰ ভূমিত প্ৰৱেশ কৰি যি বৰ্বৰ আচৰণ কৰিছিল সেয়া পুনৰ কোৱাৰ প্ৰয়োজন নাই । ১৯৬২ চনৰ আজিৰ দিনটোত চীনা সৈন্যই নামকা - চুয়েদি পুৱা প্ৰায় ৫ বজাত ব্ৰীজ ৩ দখলৰ বাবে গোলাবর্ষণৰে অতিক্ৰম কৰি তেতিয়াৰ নেফা আৰু বৰ্তমানৰ অৰুণাচল প্ৰদেশত প্ৰৱেশ কৰিছিল বন্দুক, শক্তিশালী মৰ্টৰ গানৰে সুসজ্জিত ১৫০ জন চীনা সেনা ।
চীনা সৈন্যই ৭৫ এম এম অট’মেটিক আৰু ১২০ মৰ্টাৰৰ ব্যৱহাৰ কৰিছিল সেই সময়ত । এই তথ্য তেতিয়াৰ দায়িত্বত থকা ব্ৰিগেদিয়াৰ জে পি ডালভিয়ে তেওঁৰ হিমালয়ান ব্লাণ্ডাৰ ( The Himalayan Blunder) গ্ৰন্থত উল্লেখ কৰিছিল । ভাৰত-চীন সীমান্তৰ অৰুণাচল প্ৰদেশৰ টাৱাঙৰ পৰা পশ্চিম দিশত ভাৰত-তিব্বত-ভূটান সীমান্তলৈ বিস্তাৰিত হৈ আছে ৷ অৰুণাচল প্ৰদেশৰ টাৱাঙৰ পৰা 42 কিলোমিটাৰ দূৰত্বত অৱস্থিত লুমলা অঞ্চলৰ পথেদি ১৯৬২ চনত চীনা সৈন্যই ভাৰতত প্ৰবেশ কৰিছিল ৷ দুৰ্গম পথ অতিক্ৰম কৰি, তেতিয়াৰ বৃহৎ লোহাৰ সাঁকো তৈয়াৰেৰে লুমলাৰ পৰা টাৱাঙত প্ৰৱেশ কৰে ৰঙা চীনৰ সৈন্যই ৷
ব্ৰিগেডিয়াৰ ডালভি গাৱাৰ্ড ৰেজিমেণ্টৰ চতুৰ্থ বাহিনীৰ তেজপুৰৰ 4 ক'ৰ্পছৰ বিষয়া আছিল ১৯৬২ চনত ৷ এই যুদ্ধত তেওঁ ৭ মাহ চীনা সৈন্যৰ হাতত বন্দী হৈ আছিল ৷ তেওঁৰ মতে লাডাখৰ ওপৰত চীনৰ চকু তেতিয়াও আছিল আৰু লাডাখত সেনা বাহিনী মোতায়েন কৰি তেতিয়াৰ ফ্ৰণ্টিয়াৰ নেফা বৰ্তমানৰ অৰুণাচলৰ সীমান্তত আক্ৰমণৰ আৰম্ভণি কৰিছিল ৷ সেই যুদ্ধৰ নীতি বুজি নোপোৱাটো ভাৰতীয় সেনাবাহিনীৰ চূড়ান্ত ভুল ধাৰণা বুলি মন্তব্য কৰিছে তেওঁৰ গ্রন্থত (The Himalayan Blunder) ।
উল্লেখ্য যে, ইয়াৰ পূৰ্বেই 2018 চনৰ ছেপ্তেম্বৰ মাহত অৰুণাচলৰ দিবাং ভেলীত বাহৰ পাতি আছিল চীনা সৈন্যই ৷ অক্টোবৰ মাহত এই ঘটনা পোহৰলৈ আহিছিল ৷ 2019 চনৰ 22 জুলাইত পুনৰ ভাৰতৰ ভূমিত প্ৰৱেশ কৰিছিল চীনা সৈন্যই ৷ টাৱাং জিলাৰ টাচৌ গাঁৱৰ হলি জলপ্ৰপাতৰ য়াংকিয়ন সীমান্তৰে ভাৰতৰ ভূমিত প্ৰৱেশ কৰিছিল চীনা সৈন্যৰ দলটোৱে ৷ কিন্তু শেহতীয়াকৈ একেটা স্থানতে পুনৰবাৰ ভাৰতৰ ভূমিত প্ৰৱেশৰ চেষ্টা চলায় ৷
এই সমূহে প্ৰকৃততে কিহৰ ইংগিত বহন কৰে ? নে চীনে ৰণ নীতি সলনি কৰিব পূৰ্বৰ দৰে ? এই সকলোবোৰ বিষয় লক্ষ্যণীয় হ’ব ৷
