নলবাৰী, 6 আগষ্ট: নলবাৰী চহৰৰ মাজ-মজিয়াৰ মাজদিয়াত মঙলবাৰে দিন-দুপৰতে সংঘটিত হয় চুৰি কাণ্ড ৷ ঘৰত কোনো নথকাৰ সুযোগ লৈ মাজদিয়া নিৱাসী চিকিৎসক ডাঃ অশোক তালুকদাৰ আৰু শিক্ষয়ত্ৰী চুমি মেধি তালুকদাৰৰ ঘৰত চোৰে চলাই চাফাই অভিযান ৷ দম্পতিহাল কামলৈ বুলি ওলাই যাওতেই চোৰে সুযোগ বুজি দুৱাৰৰ তলা ভাঙি সোণৰ আ-অলংকাৰৰ লগতে নগদ দহ হাজাৰ টকা লগত লৈ যায় ৷ চোৰে প্ৰায় ৬ লাখ টকাৰ সা-সম্পত্তি লৈ যায় বুলি পৰিয়ালটোৱে জানিবলৈ দিয়ে ৷ ইফালে ঘটনাটো সংঘটিত হোৱাৰ পিছত নলবাৰী আৰক্ষী উপস্থিত হৈ ঘটনাৰ তদন্ত আৰম্ভ কৰিছে যদিও এতিয়ালৈকে কোনো শুংসুত্ৰ উলিয়াবলৈ সক্ষম হোৱা নাই চোৰৰ ৷
নলবাৰীত চোৰৰ তাণ্ডৱ
