নগাঁও , 31 ডিচেম্বৰ : এইবাৰ ড্ৰাগছৰ ঘাটিত পৰিণত হৈছে চিকিৎসকৰ চৰকাৰী আবাস । নগাঁৱৰ জুৰীয়াৰ দগাঁও প্ৰাথমিক স্বাস্থ্য কেন্দ্ৰৰ চৌহদত সংঘটিত হৈছে এই লজ্জাজনক ঘটনা ৷ স্বাস্থ্য কেন্দ্ৰৰ চৌহদত থকা চিকিৎসকৰ আৱাসত চিকিৎসকৰ নেতৃত্বত গঢ়ি উঠিছে ড্ৰাগছৰ ঘাটি ৷
এক গোপন সূত্ৰৰ তথ্যৰ ভিত্তিত বৃহস্পতিবাৰে নিশা দগাওঁ প্ৰাথমিক স্বাস্থ্য কেন্দ্ৰ চৌহদত থকা চিকিৎসক বিক্ৰম দাসৰ আৱাসত আৰক্ষী বিষয়া অদিত বড়োৰ নেতৃত্বত জুৰীয়া আৰক্ষীয়ে অভিযান চলায় (Drugs Seized at Juria) ৷ এই অভিযানত চিকিৎসক বিক্ৰম দাসৰ চৰকাৰী আবাসৰ পৰা হেৰ'ইন জব্দ কৰা (Drugs Seized by Juria Police) ৰ লগতে ড্ৰাগছ সেৱন কৰি থকা অৱস্থাত চিকিৎসকসহ চাৰিজনকৈ ড্ৰাগছ সেৱনকাৰীক আটক কৰিবলৈ সক্ষম হয় (Drug users including doctor arrested while consuming drugs) ।
আটকাধীন লোক কেইজন ক্ৰমে, দগাওঁ প্ৰাথমিক স্বাস্থ্য কেন্দ্ৰৰ চিকিৎসক ডাঃ বিক্ৰম দাসৰ লগতে নেকিবুৰ ৰহমান, হিফজুৰ ৰহমান আৰু উমৰ ফাৰুক বুলি জানিব পৰা গৈছে ৷ চিকিৎসকেই ড্ৰাগছৰ আড্ডাৰ নেতৃত্ব দিয়া ঘটনাই অঞ্চলটোত ব্যাপক চাঞ্চল্যৰ সৃষ্টি হৈছে ৷ লগতে চিকিৎসাৰ দৰে পৱিত্ৰ সেৱাত জড়িত হৈ নিজৰ চৰকাৰী আবাসক ড্ৰাগছৰ ঘাটিলৈ পৰিণত কৰা চিকিৎসক বিক্ৰম দাসৰ বিৰুদ্ধে দৃষ্টান্তমূলক ব্যৱস্থা গ্ৰহণৰ দাবী জনাইছে সচেতন মহলে । ইতিমধ্যে নগাঁও আৰক্ষীয়ে এইক্ষেত্ৰত তদন্ত অব্যাহত ৰাখিছে ৷
লগতে পঢ়ক : Bribe case in Kokrajhar : কোকৰাঝাৰত উৎকোচ লৈ গ্ৰেপ্তাৰ কৃষি বিভাগৰ দুই বিষয়া
