টীয়ক, 4 ছেপ্তেম্বৰ : টীয়ক ৰাজহ চক্ৰৰ অন্তৰ্গত বলমাৰ সমীপত পুঠি নদীৰ বাঢ়নী পানীয়ে মথাউৰি ছিঙি পেলোৱাত সমগ্ৰ অঞ্চলটো বানৰ কবলত পৰে । নদীখনৰ মথাউৰিৰ ছিঙা অংশৰে বাঢ়নী পানী সোমাই অঞ্চলটোৰ বেজৰচুক, চাপানি হাবি, মৰাণ গাঁৱকে ধৰি বিস্তৃত অঞ্চল বুৰাই পেলায় ৷
অঞ্চলটোৰ একাংশ লোকৰ ঘৰৰ ভিতৰত পানী সোমোৱাৰ লগতে বহু হেক্টৰ কৃষিভূমি প্লাবিত হয় । নগা পাহাৰৰ পৰা অহা পানীৰ ঢলে পুঠি নদীৰ মথাউৰি ছিঙি নিয়াৰ ফলত সমগ্ৰ অঞ্চলটো জলমগ্ন হোৱাত পথাৰত কৃষি শস্য নষ্ট হোৱাৰ উপক্ৰম হৈছে ।
তদুপৰি এই বাঢ়নী পানীয়ে অঞ্চলটোৰ কেইবাজনো ৰবি শস্যৰে স্বাৱলম্বী হোৱা যুৱকৰ উৎপাদিত শস্যৰ পথাৰ বুৰাই পেলোৱাত বৃহৎ লোকচানৰ সন্মুখীন হৈছে কৃষকসকল । ৩৭ নং ৰাষ্ট্ৰীয় ঘাইপথ সম্প্ৰসাৰণৰে জড়িত নিৰ্মাণ সংস্থাৰ হঠকাৰী সিদ্ধান্তৰ ফল ভোগ কৰিবলগীয়া হৈছে অঞ্চলবাসীয়ে ৷
উল্লেখ্য যে, মুদৈজানৰ সমীপত নদীখনৰ ওপৰত নিৰ্মাণ কৰা দলঙৰ কাম আধৰুৱা কৰি নিৰ্মাণ সংস্থাটোৱে পলায়ন কৰাত নদীখনৰ স্বাভাৱিক গতিপথ আৱদ্ধ হৈ থকাত সম্প্ৰতি বানে প্ৰলয়ৰ সৃষ্টি কৰিছে ।
লগতে পঢ়ক : লখিমপুৰত সোৱণশিৰি প্ৰকল্পৰ বাঢ়িন পানীয়ে প্ৰাণ ললে এজন কিশোৰৰ
