গুৱাহাটী, ১২ মাৰ্চ: কটন বিশ্ববিদ্যালয়ত আন্তৰ্জাতিক মহিলা দিৱস আৰু ‘মেন এগেইনষ্ট ভায়'লেঞ্চ এণ্ড এবিউছ’ চমুকৈ 'মাভা'ৰ প্ৰতিষ্ঠা দিৱস উপলক্ষে বলীউডৰ অভিনেত্ৰী বিদ্যা বালানৰ চুটি ছবি ‘নটখাত’ প্ৰদৰ্শন কৰা হয় । মহিলাৰ বিৰুদ্ধে হিংসাত্মক ঘটনা প্ৰতিহত কৰাৰ বাবে কাম কৰি অহা অন্যতম পুৰুষ সংগঠন মাভাৰ সহযোগত কটন বিশ্ববিদ্যালয়ৰ গণ-সংযোগ, সাংবাদিকতা আৰু মিডিয়া অধ্যয়ন বিভাগ আৰু নাৰী অধ্যয়ন কেন্দ্ৰৰ দ্বাৰা যৌথভাৱে এই অনুষ্ঠানটো আয়োজন কৰা হয় ।
‘শ্ৰেষ্ঠ চুটি চলচ্চিত্ৰ’ শ্ৰেণীত অ'স্কাৰ-২০২১ৰ দৌৰত থকা চুটি ছবি ‘নটখাত’ৰ প্ৰদৰ্শনৰ পিছত অভিনেতা তথা প্ৰযোজক, বিদ্যা বালান, লেখক অন্নুকাম্পা হৰ্ষ, লেখক-পৰিচালক শান ব্যাস আৰু সহযোগী প্ৰযোজক সানায়া ইৰাণীকে ধৰি ছবিখনৰ কলা-কুশলী আৰু কৰ্মচাৰীৰ সৈতে শিক্ষাৰ্থীসকলৰ অনলাইন বাৰ্তালাপ হয় । এই অনলাইন আলোচনা আঁত ধৰে ৰশ্মি লাম্বা আৰু তনায়া ভট্টাচাৰ্যই ।
মত বিনিময়ৰ সময়ত ৰাষ্ট্ৰীয় বঁটা বিজয়ী অভিনেত্ৰী বিদ্যা বালানে কেনেকৈ চলচ্চিত্ৰৰ জৰিয়তে জনপ্ৰিয়তা অৰ্জন কৰা অভিনেতা-অভিনেত্ৰীয়ে সমাজত ইতিবাচক পৰিৱৰ্তনত গুৰুত্বপূৰ্ণ ভূমিকা পালন কৰিব পাৰে, সেই বিষয়ে আলোকপাত কৰে ।
মাভাৰ কাৰ্যবাহী পৰিচালক হৰিশ সাদানিয়ে মহিলাৰ বিৰুদ্ধে হোৱা হিংসাৰ বিৰুদ্ধে থিয় দিয়া পুৰুষসকলে কেনেদৰে একত্ৰীকৰণ, সংবেদনশীল আৰু মহিলাসকলৰ বাবে এক উন্নত স্থানলৈ ৰূপান্তৰ কৰিব পাৰে সেই বিষয়ে উল্লেখ কৰে । আনহাতে, কটন বিশ্ববিদ্যালয়ত অনুষ্ঠিত অফলাইন আলোচনাৰ আঁত ধৰে ইক' হাব আৰু বোধানাৰ প্ৰতিষ্ঠাপক নেলচনে।
লগতে পঢ়ক:ৰূপহী মহাবিদ্যালয়ত দ্বিতীয় মহলাৰ পৰা তলত পৰিল ছাত্ৰী
