গুৱাহাটী, 11 জুলাই : গুৱাহাটীৰ সংস্কৃতি দ্যা গুৰুকূল বিদ্যালয়ে চি আই এছ চি ই পৰীক্ষাত অক্ষুণ্ণ ৰাখিছে পূৰ্বৰ ধাৰাবাহিকতা ৷ দশম আৰু দ্বাদশ শ্ৰেণীৰ চূড়ান্ত পৰীক্ষাত বিদ্যালয়খনৰ অধীনস্থ শিক্ষাৰ্থীয়ে এইবাৰো উল্লেখনীয় ফলাফল দেখুৱাবলৈ সক্ষম হৈছে । শুকুৰবাৰে ঘোষিত এই ফলাফলত বিদ্যালয়খনৰ শিক্ষাৰ্থী স্পৃহা ধান্দ 98.75 শতাংশ নম্বৰ লাভ কৰি দশম শ্ৰেণীৰ পৰীক্ষাত উত্তীৰ্ণ হৈছে ।
একেদৰে 99.2 শতাংশ নম্বৰেৰে দ্বাদশ শ্ৰেণীৰ চূড়ান্ত পৰীক্ষাত উত্তীৰ্ণ হৈছে বিদ্যালয়খনৰ মেধাবী শিক্ষাৰ্থী বৎসল আগৰৱাল । বিদ্যালয়ৰ মুৰব্বী আশুতোষ আগৰৱালে জনোৱা মতে, দশম মানৰ পৰীক্ষাৰ ফলাফলত স্পৃহাৰ স্থানৰ প্ৰথম সাতজনৰ ভিতৰত আৰু দ্বাদশ মানৰ পৰীক্ষাত বৎসলৰ স্থান প্ৰথম পাঁচ গৰাকী পৰীক্ষাৰ্থীৰ ভিতৰতে থাকিব । আনহাতে, সামগ্ৰিক দিশৰ পৰাও বিদ্যালয়খনে ভাল ফল দেখুৱাবলৈ সক্ষম হৈছে । উল্লেখ্য যে, সংস্কৃতি দ্যা গুৰুকূল চি আই এছ চি ইৰ অধীনত পৰিচালিত অসমৰ একমাত্ৰ বিদ্যালয় ।
লগতে পঢ়ক : কৰ'ণা ৰোগীৰ বাবে সমৰ্পিত বিহাৰৰ পাটনাস্থিত AIIMS হাস্পতাল
