গুৱাহাটী, 3 মাৰ্চ : ৰাছিয়াৰ আক্ৰমণত বিধ্বস্ত হৈ পৰা ইউক্ৰেইন (Russia Ukraine War) ত আৱদ্ধ ভাৰতীয়সকলক উদ্ধাৰৰ বাবে ভাৰত চৰকাৰে অভিযান অব্যাহত ৰাখিছে । বৃহস্পতিবাৰেও বহু সংখ্যক ভাৰতীয় লোকক উদ্ধাৰ কৰি স্বদেশলৈ অনা হয় । প্ৰতিটোমূহুৰ্ততে ইউক্ৰেইনত আৱদ্ধ অসমৰ লোকসকলক উদ্ধাৰ কৰি আনিবৰ বাবে কেন্দ্ৰীয় বৈদেশিক মন্ত্ৰনালয়ৰ সৈতে অসম চৰকাৰে অবিৰতভাৱে যোগাযোগ অব্যাহত ৰাখিছে । ইতিমধ্যে অসমৰ 32 গৰাকী শিক্ষাৰ্থীক সুকলমে উদ্ধাৰ কৰি অসমলৈ উভতাই অনা হৈছে (Assamese students from Ukraine have arrived in India) ৷
বৃহস্পতিবাৰে পৃথকে পৃথকে মুঠ 22 গৰাকী অসমৰ শিক্ষাৰ্থী ভাৰতত উপস্থিত হয় । সেই হিচাপত এতিয়ালৈকে অসমৰ 54 গৰাকী শিক্ষাৰ্থী যুদ্ধবিধ্বস্ত ইউক্ৰেইনৰ পৰা সুকলমে স্বদেশলৈ ঘূৰি আহিছে । এই শিক্ষাৰ্থীসকলৰ ভিতৰত উত্তৰ প্ৰদেশৰ গাজিয়াবাদস্থিত হিণ্ডন বিমানবন্দৰত উপস্থিত হয় ইউক্ৰেইনৰ পৰা অহা অসমৰ আন 10 গৰাকী শিক্ষাৰ্থী ।
এই শিক্ষাৰ্থীকেইগৰাকীৰ নাম ক্ৰমে, ৰিয়া শৰ্মা ঠাকুৰ(ডিব্ৰুগড়), মহম্মদ নিছাৰ আলম(গুৱাহাটী), অমিতেশ নাথ(গুৱাহাটী), মুকুল দোশী, ৱাকিব আমিন মজুমদাৰ, অংশুল ভাৰাতীয়া, জিণ্টু ফুকন, নিশিকেশ কৌশিক, মহম্মদ পাকিজ আহমেদ(মঙলদৈ) আৰু হিমজ্যোতি তালুকদাৰ (শুৱালকুছি) ।
এই শিক্ষাৰ্থীসকলকো অসম ভৱনত ৰখাৰ ব্যৱস্থা কৰা হৈছে । অসম চৰকাৰে তেওঁলোকক বিমান যোগে গুৱাহাটীলৈ অনাৰ ব্যৱস্থা কৰিব । উল্লেখ যে শেহতীয়াকৈ অসম চৰকাৰে যুদ্ধজৰ্জৰ ইউক্ৰেইনত অসমৰ 160 গৰাকী লোক আৱদ্ধ হৈ থকাৰ তথ্য লাভ কৰিছে (Assamese people stranded in ukraine) । পৰিয়ালৰ লোককে ধৰি বিভিন্ন উৎসৰ পৰা অসম চৰকাৰে এই তথ্য লাভ কৰিছে যদিও এই সংখ্যা আৰু অধিক হোৱাৰ সম্ভাৱনা আছে (Assamese students trapped in Ukraine) ।
যুদ্ধই বিধ্বস্ত কৰি পেলোৱা ইউক্ৰেইনত অধ্যয়নসূত্ৰে থকা অসমৰ শিক্ষাৰ্থীক উদ্ধাৰ কৰি অনাৰ বাবে অসম চৰকাৰে যথাসম্ভৱ সকলো ব্যৱস্থা গ্ৰহণ কৰিছে । ইফালে ইউক্ৰেইনত আৱদ্ধ ভাৰতীয়ক উদ্ধাৰৰ বাবে তীব্ৰতৰ কৰা হৈছে ‘অপাৰেচন গংগা’ (Operation Ganga) । ইউক্ৰেইনৰ কাষৰীয় দেশৰ পৰা ভাৰতীয়ক উদ্ধাৰ কৰিবৰ বাবে ভাৰতীয় বায়ু সেনাই অভিযান অব্যাহত ৰাখিছে ।
লগতে পঢ়ক: AP High Court : আদালতৰ ৰায় অনুসৰি অমৰাৱতী হ’ব অন্ধ্ৰপ্ৰদেশৰ ৰাজধানী
